三年前，「爆眼女」一事搞到滿城風雨，隔咗咁耐，佢家人終於公開佢嘅出院紙，仲自爆上月已被停法援。

「爆眼女」嘅家人喺討論區發帖，公開佢嘅伊利沙伯醫院出院紙，入院日期係2019年8月11日。醫療報告對佢嘅診斷有右眼眼球破裂（Ruptured eyeball（RE））、外傷型白內障（Traumatic cataract）、面部撕裂傷（Laceration of face）、遇襲外傷、面部多處骨折等。

佢家人又喺帖文自爆話佢地有申請法援，但喺上月12日正式收到法援處中止援助嘅通知書。發帖人話呢個月不斷考慮係咪繼續索償，但「無奈地係種種現實情況考量下，我哋知道繼續落去只會浪費更多嘅時間同金錢」。根據《時效條例》，一般人身傷害提出申索係以3年為期限。即係話由2019年8月11日起計，而家剛剛夠3年。

舊年5月，多家傳媒爆炸話爆眼女已離港赴台，更有傳媒刊登過爆眼女喺機場「雙眼完好無缺」嘅相，惹起大眾紛紛質疑。而今次嘅發帖人聲稱佢一家以前冇、未來都唔會搞眾籌，話佢地「好努力咁係外地日日返工自給自足緊」，唔知係咪如外界推測咁去咗台灣呢？

大家對呢件事有咩睇法？不妨留言講下你嘅意見！

原圖：星島日報、網上圖片

https://std.stheadline.com/daily/article/2360867