即將卸任嘅特首林鄭月娥在一個電台節目談到房屋問題，佢就話房屋問題唔係用錢就能解決，重申係「前人種樹，後人乘涼」；佢話現屆政府有9萬多房屋供應，呢一屆政府已經覓地350公頃，加上有明日大嶼、北部都會區等計劃，這些「後人乘涼」是會看到，希望給予市民期望。

林鄭嘅「後人乘涼」真不知從何說起？喂，你搵到350公頃地又如何？

冇錯，正如有人指出，麵粉就大把，之不過擺到發霉，你都唔將佢發酵搓好，然後放入焗爐焗成噴香嘅麵包，有乜用？啲飢民都係望住啲麵粉興嘆！至於所謂明日大嶼，更加十劃未有一撇，填得海來，等有公屋立其上，恐怕係二、三十年後嘅事！反而發展北部都會區較實際，之不過，冇十年八年又係難見有乜嘢成果！所謂「給予市民期望」又係一味吹水，臨卸任，就係不忘往自己臉上貼金！

各位，實情係政府覓地建公屋大落後，輪候冊愈積愈厚，公屋輪候時間再創本世纪新高，一般申請者平均輪候公屋時間攀升至6.1年，創1998年有紀錄以來新高，而且恐怕仍未見頂！基層等上樓，尤其10多萬劏房戶逾20多萬人真係望到頸長眼出血！虧林鄭仲好意思一味吹噓甚麼「前人種樹，後人乘涼」！唉！後人淒涼就有份！

呢嗱！聯合國2009年嘅報告再次闡述適切居所嘅要求，其中包括：穏定居所、提供基本嘅設施、負擔能力、適合的居住程度、住屋機會、地點、文化共融等。現時香港，唔好話「籠屋」，仲有劏房，有所謂「廚廁合一」、「上床下廁和廚房」嘅另類設計。

講真，香港呢個大都會、金融中心，同聯合國所列舉嘅最低住屋標準目標，確實仍有一大截距離！「廚廁合一」更離「安全尊嚴」嘅住屋概念十萬九千里！

真要令基層「房事暢通，生活輕鬆」，看來還是要寄望下屆特區政府。下屆政府架構重整，將由3司13局變成6司15局。其中運輸及房屋局一分為二，其一係「房屋局」，其二係「運輸及物流局」。呢個「拆局」，獲得議員及社會廣泛認同，新架構下，運房局以往由政務司司長統籌，今則歸財政司司長統籌。新一屆特首李家超指發展房屋與經濟發展息息相關，希望產生統籌及指揮會做得更好。

房屋局聚焦搞「房事」，專心一致為民就事成。

有論者曾指出，香港土地供應由生地變熟地，即係一塊地由規劃到可以起樓，平均要成14年；之前發展局話考慮設法縮短城市規劃委員會制訂法定圖則所需時間，由17個月壓縮至大約9個月。以綠化地帶改公營房屋為「熟地」為例，由原先涉及法定及行政程序需要六年時間，預計可節省當中兩年至兩年半嘅時間。講係咁講，實際情況又係另一回事。

本屆政府落雨收柴，先來講精簡發展程序，又話壓縮呢樣又精簡嗰樣！有議員指整體贊成上述建議，認為原先需用20年時間構建嘅「北部都會區」，可壓縮至10年時間。嗱！其實早有媒體力促港府倣效深圳一站式處理規劃建築審批程序：由一個專責部門提供規劃、發展、發牌等一條龍審批服務。一河之隔嘅深圳，單係河套區，香港這邊仍係爛地一塊，同一河之隔那邊嘅高樓林立，豈可同日而語？香港今日，淪落至此，就係講多過做，筆者寄望新班子嘅「房屋局」發揮效率，快把麵粉變麵包，切勿種子都未播，一味奢言甚麼「前人種樹，後人乘涼」！

原圖：星島日報、文匯報

http://paper.wenweipo.com/2020/08/13/HK2008130018.htm

https://std.stheadline.com/realtime/article/1755020