美國無法摒棄冷戰思維，研發高超音速武器三試三敗後，近日聲稱，3月中旬用B-52轟炸機成功試射咗一枚高超音速導彈，但為咗避免同俄羅斯緊張局勢升級，所以一直冇公開消息云云。

且不論其所言虛實，但美國接下來嘅行動明顯係針對中國。美國拉攏英國、澳洲5日宣布，三國將合作發展高超音速導彈，擴大三邊安全協議,即AUKUS的合作範圍。眾所周知，AUKUS係美國從地緣政治上搞出嚟遏制中國嘅怪胎，從早前嘅澳洲核潛艇項目，到今日嘅合研高超音速導彈，都係為怪胎輸送養分，企圖將其培育成日後震懾中國嘅怪獸，實現圍堵中國嘅陰謀。

中國成功試射高超音速武器嘅消息，最早見於去年10月英國《金融時報》嘅報道，當時中國外交部稱，試驗只係例行嘅航天器試驗，但美國被害妄想症發作，立即大肆炒作中國核威脅論。其實，高超音速技術並非只有軍事化用途，更多係用於航天領域，只不過美國向來小人之心，視中國科技發展係眼中釘，只要一有風吹草動就捕風捉影，想方設法造謠抹黑，甚至阻撓打壓。

美國近年發展高超音速武器老貓燒鬚，落後於中俄，喺美國眼中似乎早就相信，中國高超音速武器研發已將其拋離。近日消息指，俄羅斯喺烏克蘭戰場至少應用咗兩枚高超音速導彈，更加刺激美國脆弱嘅神經，勢要掀起新一輪軍備競賽與中俄較量，似乎就顯得順理成章了。

美英澳共同研發高超音速導彈嘅決定可用瘋狂嚟形容，再次違反咗核不擴散條約精神，高超音速武器嘅震懾力除咗不可防嘅特性外，亦可搭載核彈頭，美國此舉勢必醞釀亞太地緣政治新危機。

中國常駐聯合國代表張軍警告，該計劃有機會造成類似烏克蘭衝突嘅危機，不願見到危機重演嘅人，應該避免做出呢類行為，正如中國諺語「己所不欲，勿施於人」。

但美國對華政策短期難見逆轉，為咗維護國家安全，我哋是否應考慮，創造更多抗衡美國壓力嘅工具？既然美國如此懼怕中國核力量發展，我哋係咪更應增加核彈頭數量及發展更強大嘅核載具呢？只有中國能站在實力的地位同美國對話，或許才能迫使美國作出共存嘅決定。