疫情下種種怪異的眾生相浮上水面，令人誤以為自己活在平行時空。

政府宣佈，一般人須打3針疫苗才能夠堂食，措施提前至5月31日實行。唔打齊三針，你邊度都唔使去。有網民「智將」上身，竟然想出一條絕世好橋：以500大元，求購帶有病毒的口水，用來「證明」自己確診。

原來，這位智者已打兩針，只因不想打第三針才會如此放大招。如果一針未打，我理解；但你都打了兩針，點解要抗拒第三針？抑或你為了多儲幾天大假，留來年底通關去旅行，所以用500蚊小錢買口水，其實係捉緊一盤好大嘅棋？ 

事後有專家好認真同買家解釋：「買口水有無用都唔知」，為一條潛在賣確診口水的產業鏈封了後路，口水不能成為確診者的被動收入。話時話，好在政府未派消費券，否則用消費券買口水，就更加有黑色幽默了。

令人會心微笑的事豈止一單。近日有網民在討論區發文指，有同事感染新冠肺炎康復後，在公司經常不戴口罩，而且每天外出堂食，如果其他人勸佢注意一下，這位仁兄還會忽然「磚家」上身：「驚咩啫，好返有抗體，唔怕再中招！再中就會有更多抗體！」

抗疫抗到古古怪怪

帖文一出，大部分網民都O咗嘴。有部人形自走播毒機器喺你身邊趑趄噉轉，你話唔驚嚇就假。更驚嚇的是，將高智能諗法當成道理，理直氣壯地播毒，一往無前，令我不禁要對佢發出靈魂拷問：明明有腦都唔捨得用，留嚟做遺產咩？

短短半個月，警察接連拘捕兩人，他們涉嫌用包括糞便在內的物料「裝修」方艙醫院。入方艙隔離，不過兩三個星期，但這麼短的時間，原來足夠叫人的「理智」弱化，而且臭事竟然成雙。

香港的怪人異舉一單又一單，與躺平抗疫、攬炒救港、反政府、反疫苗、唱衰內地醫護的聲音加在一起，維多利亞港上空出現光怪陸離的大合奏，再問你一次，你驚唔驚？

一時「買毒」，一時「播毒」，一時「撒毒」，唔講仲以為睇緊幻海奇情式的武俠小說。當香港抗疫抗到古古怪怪的時候，當港人熱衷以謠言決定生活節奏的時候，當一啖有毒口水價值500蚊的時候，智商又值幾多錢一両？