每到年近歲晚之時，總有提醒提防盜竊，意想唔到嘅係，今年仲要提防埋Omicron變種病毒。原本以為已經沉寂嘅新冠肺炎再次肆虐香江，執筆之時已有數百人染疫，被圍封強檢嘅市民不計其數，加之政府再次收緊防疫政策禁止晚市堂食，喺送牛迎虎之際，唔少人生計再遭重創，香港人臉上不見喜慶，反是一片愁雲慘霧。

防疫失敗，市民憤怒，係理所當然之事，絕對理解，但應該由邊個去承受香港人嘅怒火呢？係我哋尊敬嘅特首林鄭月娥？定係食衞局局長陳肇始？定抑或係政府專家顧問袁國勇教授？我唔知亦都唔想評論，但點都唔應該由前線防疫人員去承受下話？

眾所周知香港人嘅投訴文化根深柢固，加上被圍封被隔離就肯定心情唔多好，然而就算受影響市民點樣鬧爆都好，某啲高高在上坐喺辦公室嘅官員們閂埋房門繼續聽唔到睇唔到，最後直接面對市民怒火嘅，咪就係企喺抗疫最前線嘅紀律部隊、檢疫人員、清潔工人、房署職員……試問佢哋所受委屈，又可以如何發洩？

近日葵涌邨爆疫事件中，出現唔少令人詬病嘅事件，例如檢測安排不周、清潔衞生欠佳等，令人不禁質疑，都唔係第一次做圍封檢測啦，點解仲可以咁多甩漏？香港市民唔明，前線人員可能都唔明，但佢哋只能聽命行事，就算知道某個點有問題，都只能向上頭反映，至於上面會否回應，就唔到佢哋控制。前線人員夾喺政府同市民之間，真係有苦自己知。

香港警察同一班前線防疫人員，喺香港危難之時從不缺席，始終謹守崗位，無私地守護市民，即使農曆新年都未必可以與家人團圓。新一輪疫情未見尾聲，大吉利是講句，圍封強檢隨時會發生喺你我身上，若真有萬一，對住高官尚且不論，但面對前線人員，香港人不妨互相體諒，多一點正能量，讓我們一起畀Like打氣，向所有前線人員送上最崇高嘅敬意！

原圖：星島日報

https://std.stheadline.com/realtime/article/713893/

https://std.stheadline.com/realtime/article/1801272/

https://std.stheadline.com/realtime/article/1799085/