繼黃營最大嘅《蘋果日報》收檔之後，《立場新聞》、《眾新聞》同一堆講出嚟都未必有人聽過嘅黃色媒體，先後步其後塵宣布停運，當中更有相關高層正被警方國安處調查。睇見黃媒窮途末路，網上有黃友就大呻「香港以後冇新聞睇」，睇到我當堂嚇一跳，然後當然係得啖笑啦！

香港真係冇新聞睇？先唔講香港係一個資訊發達而且網絡自由嘅城市，冇《蘋果》冇《立場》你大可以去睇西人媒體，人哋一樣有報香港新聞。而香港本身仍然有唔少營運多年嘅傳統報紙同網絡媒體，就連電視台新聞都有一大堆，咁又點會冇新聞睇呢？

睇新聞就不嬲都應該係多面性咁睇，再配合獨立批判思考去看待每一件事，間間媒體都話自己係持平中立，真係間間媒體都真係持平中立咩，編輯記者都係人，係人就會有立場有個人感情投入喺報道之中。所以就算本身幾唔鍾意某啲報道偏頗嘅媒體都好，睇多啲唔同媒體嘅新聞，了解唔同角度嘅睇法，大家都咁樣社會先可以進步！

如果因為「同路人」媒體收檔，黃友就話「冇新聞睇」，咁好明顯，佢哋由始至終都唔係想睇「新聞」，而只係想睇「宣傳」，想睇到認同自己價值觀嘅報道，催眠自己做緊正確嘅事。如果抱住呢種心態嘅話，即係代表黃友根本都對自己嘅所謂「信念」充滿懷疑，先要喺別人身上尋找肯定。如今黃媒覆亡，黃友先如夢初醒，原來自己早被香港人拋棄！

原圖：星島日報

https://std.stheadline.com/realtime/article/1793155/