中國美女多，大家都知，但最近有4位中國美女特別引起大家嘅關注，就係中國外交部嘅4位女神啦！今日，等筆者同大家盤點吓中國外交部女神喇。

早前中美兩國展開高層戰略談話，外交部翻譯司嘅高級翻譯張京，憑住出色嘅翻譯，引起網民熱討，加上生得靚，一舉衝上新浪微博熱搜，外交部嘅靚女從而被網民關注起上嚟。

其實中國外交部一向被稱為「外交天團」，皆因佢哋除咗遇事不驚，專業嚴謹外，更有好養眼嘅外表同氣勢，外交部部長王毅更擁有大批粉絲，一出現就會有粉絲為佢打Call（應援）。除咗男神，外交天團仲有好多女神，今日同大家特別介紹吓張京、錢歆藝、姚夢瑤及張璐。

錢歆藝御姐范十足

(1)外交部翻譯司高級翻譯張京：杭州人，2003年從杭州外國語學校畢業，保送到外交學院英語專業，為夢想拒清華，2007年被外交部錄用。張京喺2013年嘅大人記者會亮相時，已獲得大家關注，當時佢被指似足藝人趙薇，有「冰美人」之稱，雖然當時已獲得關注，但佢拒絕晒社交媒體嘅採訪，原因係張京話「我的工作代表的是國家，不希望受到外界更多的干擾」，一個句，「型」！

(2)外交部翻譯錢歆藝：錢歆藝母校為杭州外國語學校，係一所專門培訓高級翻譯人才嘅學校。錢歆藝喺2015年3月6日，全國政協十二屆三次會議嘅記者會、發布會上，因頭戴髮卡，御姐范十足，因而爆紅網絡，被稱為「髮卡姐」。

張璐翻譯嚴格高標準

(3)小清新翻譯官姚夢瑤：姚夢瑤從小就對英文感興趣，初中時代就可以背晒成本英文詞典，後因優異成績考入「北京外國語大學英語學院」，並喺2007年考入外交部，姚夢瑤喺2012年十一屆人大五會走紅，當時嘅佢仲未夠30歲，其後更被安排為總理夫人出訪非洲嘅隨行譯官，可見實力非凡。

(4)四美中的「老大」張璐：張璐為現任外交部翻譯司葡語處處長，張璐係總理嘅御用翻譯，跟隨過總理出席過好多大場合，亦曾任前任主席胡錦濤、前任總理溫家寶嘅首席翻譯。張璐對翻譯有好嚴格嘅高標準，每當大家認為工作完成，已經好完美嘅時候，張璐卻會話，「哪怕再給我多一秒鐘，我還能翻譯得更準確」。工作認真嘅女人，確係迷人。

以上4位就係四大翻譯女神，都係始於顏值，陷於才華嘅好例子，你又鐘意邊位多啲呢？

原圖：網絡圖片