前任廣播處長梁家榮提早解約閃人，有報道指港台新任處長李百全履新冇耐即大發官威，下令所有節目必須先經過佢親自審核，睇過冇問題先畀出街，據悉《香港故事》已被剎停，收投訴之冠嘅《鏗鏘集》亦隨時成為新任處長立威嘅目標。

同傳媒出身嘅梁家榮唔同，李百全擁有超過30年政務主任經驗，曾經服務過唔同嘅部門及政策局，就背景嚟睇，大家姑且可以先相信佢屬於「愛國者治港」陣營嘅一員，應該就唔會好似梁家榮咁縱容下屬。

李百全忽然「空降」港台，少不免招致黃營反彈，隨即有黃媒大造文章，針對李百全並無從事傳媒行業經驗，企圖抹黑新任處長嘅威信。港台積弊多年未改，正因為有人總以所謂「編輯自主」、「新聞自由」作幌子肆意妄為。比起一個傳媒經驗豐富嘅「總編輯」，相信香港市民更願意見到廣播處長之位由一個有能力嘅「管治者」擔任。

不過，俗語有話一隻手掌拍唔響，港台之亂自然唔係梁家榮一個人所能造成，如今只係換一個李百全做處長，又點可以徹底解決港台嘅內部問題？港台節目話多唔多、話少唔少，就算李百全親自把關每一個節目，但佢始終都係人，難免有日睇漏眼。

貴為處長要處理嘅事務多不勝數，逐個節目審核嘅做法，長遠嚟睇實在太唔現實，若然真係有心求變，與其浪費心神去防備別有用心嘅人喺節目「加料」，倒不如嚟一次大刀闊斧，建立全新嘅管治團隊從上而下改革，逐漸將港台內嘅黃色瘀血徹徹底底清除，令香港電台再一次成為香港人嘅電台，咁先至係一勞永逸嘅做法。

李百全管治港台所面臨嘅第一個重大考驗，或者就係黃到出汁嘅利君雅能否成功續約，全香港市民即管放長雙眼，睇清楚呢位新任處長係咪合格嘅「愛國者」！

原圖：港台節目《視點31》截圖