香港中文大學終於有望擺脫「暴大」污名，恭喜！

中大當選學生會內閣「朔夜」公然抹黑《港區國安法》，校方勸極唔聽，係都唔肯收回言論認錯道歉。OK！冇問題，校方即刻割席落封殺令，麻煩學生會自己註冊為社團，有咩法律責任，唔該自己孭上身！

Come on！你哋係大學生，唔係中學生更唔係小學生。如果係小學生誤入歧途，大家會理解你年紀尚小；如果係中學生，大家都會明白你可能只係受人利用；至於大學生喇喎，雖然話就話學生啫，已經係成年人喇，學會承擔責任是常識吧？

對於中大今次嘅做法，可能有人會覺得校方不負責任，拋個波畀班學生就算。之不過，黃友經常自以為有「獨立思想」、「自由意志」，人哋講乜都聽唔入耳，既然大學用「教育」嘅方式行唔通、管唔到，咁不如交畀國安去管，等嗰班「優秀嘅細路」親身學習吓，乜嘢叫做法治、乜嘢叫做責任！

搞笑嘅係，有人攞完彩唔想負責任，「朔夜」班友仔一聽到話要自己孭飛，即刻縮沙話撤回參選宣言同政綱，之前嘅堅持去晒邊？上年畢業禮仲好多人大嗌「一息尚存，抗爭到底」㗎喎？口號果然只係口號！

今次中大咁成功，其他院校好應該睇齊做法，自己管唔到、唔想管，唔緊要，交畀專業嘅人去管，包貼服！「段爸」段崇智校長今次總算硬起來，係抵讚嘅，不過一件事還一件事，幾時先肯出嚟同香港警察道歉呢？

原圖：大公報圖片、無綫新聞截圖

http://www.takungpao.com.hk/news/232109/2019/1122/377485.html