俗語有話，學好要三年，學壞三日就夠，而香港培正中學涉獨風波，拖咗足足三個月。校方由避而不談到出聲明回應，再到近日接受媒體訪問，但成件事其實一啲進展都冇，依然糾纏緊喺有冇收到家長「具名投訴」，呢一個根本算唔上係問題嘅問題上面。偏偏教育局非常「配合」，放任培正中學玩足三個月，直到目前呢一刻，仍未見局方有打算出手撥亂反正嘅跡象。

三個月之前，亦即係上年10月，教育局破天荒取消九龍塘宣道小學一名播獨教師嘅註冊資格，當時香港人尚有些許期盼，心諗教育局終於下定決心做嘢，著手處理積弊多年嘅教育問題。點知三個月後嘅今日，除咗一名可立小學老師因為錯教鴉片戰爭而被釘牌，就只有一名有傳喺龍翔官立中學任教嘅老師正面臨釘牌。

如果三個月時間，只可以處理唔夠三宗失德教師問題，教育局咁嘅工作效率，我相信香港絕大部份嘅家長都唔會滿意。2019年反修例暴亂中過萬人被捕，當中有幾千人係學生，依家同你講話得原來全香港得幾個老師有問題，我講你都唔信啦！

其實培正事件只係冰山一角，黃師猖獗嘅根本原因，在於教育局放任無為，所謂「為官避事平生恥」，培正培「不正」，教局最可恥！香港他朝若滿街「優秀嘅細路」，教育局絕對難辭其咎，如果冇心做嘅話，不如讓個位出嚟，等其他有心有力嘅人做！

原圖：香港培正中學網站圖片、大公報圖片

https://www.puiching.edu.hk/CustomPage/paragraphGroup.aspx?ct=customPage&webPageId=27&pageId=54&cpmId=39

http://www.takungpao.com.hk/hongkong/text/2020/0122/409257.html