香港培正中學校長何力高忽然搵返條腰骨，同校監何建宗一齊以訪談形式回應涉獨醜聞，兩位高層肯出嚟交代，當然係好事，殊不知堂堂校長同校監，行事竟然鬼鬼祟祟，將訪談擺喺一份並未對外公開嘅《培正同學通訊》度，聽聞更只供海外校友私下傳閱，邊個對培正涉獨醜聞有疑問，就直接send呢份嘢打發對方！
做到呢個份上，訪談內容講啲乜，已經唔再重要！若問心無愧，何必行鬼祟之事？提提大家，何力高除咗係校長，亦都係一位老師；何建宗好好醜醜都叫做同「教育家」三隻字沾到邊啊，相信大家只聽過有老師教學生做人要堂堂正正，未聽過有老師教學生行事要偷偷摸摸囉！
為人師表做壞榜樣，何力高同何建宗所摧毀嘅，當然唔只自己嘅名聲咁簡單，更令「培正」呢兩隻字嘅百年聲譽蒙污！難怪據報上年就連廣州姊妹校都恥與為伍，唔歡迎香港代表以「培正同學會」名義出席校慶啦！
兩位校方高層喺秘密訪談中，口口聲聲話「愛國 愛港 愛培正」，真係好想問兩位，到底你哋愛嘅係邊一個國家？如果真係愛培正，點解仲要親手喪送培正清譽呢？仲好意思話自己係「紅藍兒女」，星條旗嗰隻紅，定係米字旗嗰隻藍啊？
之前講過，香港培正中學「獨」到醫返都嘥藥費，不如「殺校」一了百了；依家諗深一層，何力高同何建宗兩位自己無恥啫，始終「培正」兩隻字係無辜嘅，好心香港培正中學自我除名，唔好再掛住「培正」個牌頭喇，改名「培歪」豈不更貼切？！
原圖：香港培正中學網站圖片
投票已截止，多謝支持
返回
