「十二瞞逃」想走佬台灣，好在天網恢恢，最終都係畀中國海警截獲，一切由「反對送中」開始，以「自動送中」結束，除咗「抵死」兩隻字，真係諗唔到其他更貼切嘅形容詞，最多加多隻字畀佢，「抵x死」！

淨係睇太子站831事件，已經知黃友想像力豐富，活喺自己嘅世界入面，唔知佢哋係思想太離地定太天真，竟然以為可以好似《賭俠》橋段咁，隨隨便便就駛架船直出公海？現實係，離開香港，無論你走東南西北定上天下海，都一定要越過中國疆界，今次事件更加證明，香港係中國密不可分嘅一部份，就有如「一國兩制」，「兩制」前面，永遠都係「一國」行先。

「十二瞞逃」來頭唔細，其中身負國安法案件嘅同李宇軒，被指同「我要攬炒」團隊關係密切；有幾個更懷疑係所謂「屠龍小隊」成員；至於其他人，唔係有案在身，就係畀警方通緝緊，佢哋之前對香港做過啲乜，自己心知肚明。今次班友仔「自動送中」，根據內地刑法，最高可以判處一年監禁，仲未計判刑前一連串嘅偵訊過程，分分鐘拖一年半載，即使日後刑滿返港，又要面對另一場審判，條數長找長有。

話呢班友仔自投羅網，投嘅除咗係中國海警嘅網，更係國家安全嘅法網！成班黃友傻仔到以為憑一架「大飛」可以遠走高飛，諗住搞亂完香港拍拍籮柚就可以鬆人，好彩天地有正氣，家陣齊齊「送中」，抵死！

原圖：無綫新聞截圖、港台新聞資料圖片

https://news.rthk.hk/rthk/ch/component/k2/1494396-20191125.htm?archive_date=2019-11-25