【2020立會延選系列】人大決定現屆立法會議員延任最少一年，反對派議員去留頓成全港焦點，千呼萬喚之下，總於等到「鍾氏民調」結果出爐！到底佢哋會唔會順應民意，齊齊辭職？怕且花生價格都要持續上漲喇！

鍾庭耀旗下「香港民意研究所」所做民調日前公布結果，其中一條就咁問：「人大常委決定現屆立法會繼續履行職責不少於一年。你有多支持或反對全體立法會議員繼續出任議員？」

結果顯示，有63%屬於「民主派支持者」嘅受訪者表示反對，而支持者不過20%！係人都知鍾庭耀黃到出汁，但今次嘅「鍾氏民調」，竟難得與香港真正嘅主流民意不謀而合！

民意昭昭擺在眼前，不過作為黃營第一大黨嘅民主黨似乎接受唔到！該黨喺民調結果出爐同日表示，希望喺9月內進行「具公信力的大型民調」，希望避免出現「搬龍門」、「隨意演繹」等爭議喎。

咦？奇怪喇！乜民調結果唔係已經好清晰喇咩？點解仲要做多一次民調？如果結果又係多數人反對延任，係咪又要做多次民調，做到佢哋滿意為止？到底係邊個喺度「搬龍門」、邊個喺度「隨意演繹」啊？媽啊我好亂啊！

唉，其實成件事一字咁「錢」，睇怕班政棍計過度過，都係唔捨得月入十萬嘅高薪厚職，當初口口聲聲話要睇埋民調結果，家陣又扭扭擰擰唔肯找數，你話搞到咁肉酸又何苦呢。平時咁鍾意話自己係「民意代表」，今次不如大方啲聽一次民意，求吓你聽一次就好，真係聽一次就夠㗎喇，即刻辭職啦！

原圖：無綫新聞截圖、香港中通社

http://www.hkcna.hk/content/2019/1008/788112_3.shtml