香港疫情又再失控！有比較就知香港防疫抗疫都唔掂，最戇居就係有啲人花崗岩頭腦，以為內地抗疫一定差過香港，這種先入為主嘅態度，不知道帶來多少偏頗。事實上，深圳至今確診者只有四百多宗，而香港已經超過千六宗，雖知深圳常住人口超逾一千三百萬，比香港要多近倍！

嗱！港大深圳醫院院長盧寵茂都話，如果你驚深圳嘅人過嚟，不如掉返轉話，深圳嘅人驚港人過去多啲！盧院長一言驚醒香港人。咪成日居高臨下自以為是，香港不思進取，得過且過，好多嘢落後人前喇！

內地防疫遠勝香港

至於國內其他大城市，抗疫都比香港出色。筆者看過一位常偏坦黃絲嘅作家，都高度讚揚上海嘅隔離做得認真過香港多多聲，佢話香港漏洞百出，而佢朋友從歐洲來上海、經香港，兩地隔離都試過，指出下機處理就好大差別：香港係所有班機人都擠在一起排隊，但上海則是將不同班機嘅人分隔開來，沿途看顧，直到檢疫中心；而香港出咗關，只係叫佢去一號停車場撿疫，冇人話佢聽應點樣走，即使走脫了也冇人理！

見微知著，政府防疫抗疫無能，衰過濠江，差過深圳，彰彰明甚。其實，廢官防疫意識，以牛棚困貓嘅思維，抗疫梗係穿窿喇！尤其對入境者的疏於防範，更令人詬病。有論者就講得啱，過去幾月，每天睇新聞都令人有荒謬感，即使冇本地感染，幾乎每日都有外地傳入案例。好明顯係政府把關不力。

嗱！從澳門去珠海，或由珠海赴澳門，雙方均要求旅客出示健康碼或有效核酸檢測陰性證明，而香港卻「門常開」，對入境者完全冇呢方面要求。問題就係呢度，若然香港好似澳門、珠海咁，要求入境者出示七日內核酸檢測證明，乘客登機，冇證明就唔準登機，如此一來，外地傳人個案必然可以截斷。

廢官無能玩殘市民

當然，政府要把關得嚴，杜絕任何「特權者」都不可以無健康碼或檢測證明而有入境豁免！粵港澳三地健康碼互認制度，一再「重新檢視」而難有推出時間，罪在港府。難怪論者直斥：廢官無能，玩殘市民！

仲有吖，香港一直被詬病為檢測病毒量偏低，政府就成日呻人手不足，好喇！深圳市政府肯「拔刀相助」，安排兩間深圳公司為港人檢查病毒，呢！毒果報又廢噏甚麼「逾四十萬港人DNA恐率先送中」！阿哥，係疫情如此失控之際，仲唯恐天下不亂，係要挑撥反中仇中情緖，居心不可謂不叵測吖！抗疫都搞政治化，你話香港立法會若然由黃絲議會控制，香港獨贏得「攬炒」兩字，想香港好，九月投票選新一屆議員，大家應知道不投反對派一票，才可「保一國兩制，還香港穩定」！

原圖：無綫新聞截圖