由於有讀者反映之前筆者介紹過既「富士咭」已經不再有售。所以今日臨時抽起久慈篇，介紹過另一張上網咭比大家。 而最諷刺既係，今日介紹既呢一張上網咭偏偏係上年我叫大家唔好買既Docomo 7日上網咭，係同一間公司出的，唯一唔同既地方就係由七日任用改左做八日上限2GB用量。 首先重溫下點解上年我話唔好買Docomo 7日上網咭先，嗰張咭每日得首100MB係可以用4G LTE既速度，其後只可以用限速3G 128kbps嚟無限上網。100MB話咁快就爆啦，所以買嚟都無用，亦都因為咁，團購網成日都做呢張咭既團購，歡迎大家繼續中伏！ Docomo 4G  8日2GB 上年年尾，呢間公司推出左新既8日咭，雖然今次不再係無限任用。但係8日內有2GB用量兼 4G LTE既速度給你用。2GB對好多香港人嚟講已經非常夠用，一般香港人都係用2至3GB左右一個月，依家有2GB用量就算你搭新幹線睇myTV都絕對無問題。當然啦，如果你部手機唔支援4G又或者你去既地方無4G覆蓋的話，就會轉用3G無限速既網絡。我今年3月頭拎住部Sharp日系手機去東京、名古屋、京都甚至係金澤都一樣有4G用。就算喺新幹線上面睇片都無窒。值得介紹的！ 提提大家，一如平時的Docomo咭一樣，國產手機例如小米等係用唔到的，我親身帶咗一部最新既小米Note過去，無論我點樣手動揀網絡同手動設定APN，都係無辦法令佢有訊號。另外，有台灣用家話連HTC都一樣唔支援。大家出發時最好留意下自己部手機，又或者帶定多一部舊款機過去做share喇。 最後講講價錢，旺角格仔鋪賣98元一張，Yahoo!拍賣我買過最平85元都有交易。建議大家多多格價。 好喇，下星期繼續海女篇。下星期見。 圖：由作者提供