今日帶大家去江之島，江之島係一個距離東京一小時車程既一個島。如果用香港地方黎形容既話，我會用大嶼山嚟形容，因為同樣係舊舊地，又有廟又有大佛。台灣既朋友多數會用十份（台灣新北市既一個地方）嚟形容江之島，因為同樣係坐小火車穿梭古舊既村落。其實筆者好多年前已經去過江之島，不過近年呢個地方連旅遊書都唔再介紹，加上早前旅行又無影太多相，所以一直都無為大家介紹，一直到去年杜如風小姐既電視節目介紹之後，突然多咗網友問。於是我就再次踏足呢個地方。 表面上，江之島只係地圖左下方既一個小島，島上面有一個重要景點江島神社。事實上，由地圖左上方既藤澤開始一直到右手邊既鎌倉，都係今次既行程。要遊覽江之島既話，要花一整天時間，大約係9至10點嚟到，玩到5、6點走就啱啱好。而遊覽既次序，一般都係由左至右咁玩落去，而呢個亦都係一連三個星期日所介紹既行程。 片瀨江之島站 從新宿出發，坐小田急既浪漫特快，約65分鐘就可以黎到片瀨江之島站。（詳情請留意兩個星期後江之島3既文章） 同個站影完相之後，行過天橋然後會見到江之島旅客中心，旁邊有條隧道，行落去一直行，又會見到一條跨海大橋，跟住就會到達第一個景點，江島神社。   江島神社 過咗大橋之後，會見到下面呢條老街。 沿途都幾多手信買，其中一間賣水晶既唔錯，多款又平。之後行多幾步，終於到江島神社既正門。 要參觀神社就要上山，唔想行樓梯既話，右手邊有個售票票，賣乜？賣登山電梯票！ 沿住電梯上山，會經過邊津宮、中津宮等等，大家可以影吓相，求吓籤，寫吓繪馬。之後就會去到最後一條電梯，就會上到山頂。 上到嚟山頂第一樣會見到既就係上圖既瞭望塔（我唔比錢上去喇，影張相大家睇下算啦），而旁邊有間好出名小食店，賣江之島既特產既八爪魚餅。 好好食，好似食緊蝦餅咁。之後繼續行， 向奧津宮／龍戀之鐘同岩屋方向行。 當你行到嚟上圖呢個地方之後，記得影張相記低佢。繼續直行既話就可以去到奧津宮／龍戀之鐘同岩屋，之後係要行回頭路，嚟番呢個地方，沿右手邊下道既巷仔落番山的。 睇上面呢個指示牌會容易明啲，由於颱風天雨關係，今次我無去到岩屋，不過都有冒雨去龍戀之鐘。大家繼續行啦。 鎖係要自備的。行完江島神社，沿路經過正話既跨海天橋，行番去江之島站。（係江之島站，不是片瀨江之島站呀！）就可以繼續我地既行程。 下星期日，筆者會帶大家去江之島既另一景點長谷大佛，同埋日劇古書堂事件手帖既拍攝地鎌倉。下星期繼續遊江之島。 圖：由作者提供，江之島地圖取材自小田急電鐵網頁 http://www.odakyu.jp/tc/traffic/