一連兩集既台場介紹之後，相信大家對台場都好熟悉架喇。今日係車迷天地，集中介紹豐田城同埋之前杜如風小姐都介紹過既東雲汔車超級市場。 豐田城就係喺Venus Fort旁邊，一齊入去參觀下啦。   呢部i-Road真係有軚盤的，定員二人。即係可以前後坐兩個人，啱晒香港。 由於筆者係渣Smart Fortwo既關係，所以專登玩下部IQ，的確係唔錯。收埋車尾箱時仲可以坐四個人！提提大家，呢度擺出黎既車都係任你玩的，你想開門、坐上去、開車尾箱睇下有幾大全部都無問題。如果需要測檢下電器用品既話可以通知職員幫手。只係唔容許你渣走佢，不過啲車都無油既，想渣都無辦法。 Porte真係一部好車，車仔細細，個車尾箱大到咁。都唔明點解香港無行貨。 =.=" 豐田城地下既呢個地方，就係可以比大家免費／付費試駕既地方。一般黎講如果你想試渣新款車既話要預早一個月上網Book定同埋要比少少錢，現場即睇即試既只會淨番舊車款。呢度有條專用既賽道，不過時速上限係40公里，有國際牌就玩得。未渣過HYBIRD既朋友黎試下車，感受下的確係唔錯。 近期去到，原來依傢有Segway免費試玩！大家只要夾岩時間黎呢度上一個15分鐘既免費課程，識玩之後，就可以免費借用30分鐘。呢30分鐘入面，你係可以渣埋部Segway入去Venus Fort商場行街的，你都咪話唔過引。不過，英語課程全日只得一節，仲要係下午兩點。筆者唔岩時間所以無玩過，大家去到時自己夾下時間啦。 上圖呢部係動感遊戲。比大家挑戰下你手車有幾慳油。當然又係免費！！ 呢度仲有間動感戲院，即係好似香港既Motion Chair咁。片長約20分鐘，每30分鐘一節。當然又係免費！！ 最後，梗係要玩埋GT 6先好走啦，閒日黎唔多人排隊，行埋去即刻有得走。最重要當然又係免費！！ 玩左半日，一蚊都無洗過，係時候要破下財，去東雲汔車超級市場度行下喇！ 東雲汔車超級市場 - Super Autobacs 由台場去東雲係要搭JR+TWR線的，無人駕駛既白合海鷗號係唔到架！ 由台場（即東京Teleport站）過黎只係兩個車站，車程約5分鐘。好快就到。 一落車，望出街，見到藍紅色廣告既建築物就係架喇！ 一出地鐵站，望住座建築物，一路過馬路行過去，幾分鐘就行到黎呢個門口。近鏡頭黑色嗰座係賣二手車的，中間矮矮既係驗車中心，最後面高高地紅藍色既就係超市，入口在二樓。 話明係超級市場，當然有番咁上下大啦，不過唔好比個牌呃左，其實係得一層(2/F)可以行，三樓係洗手間同Café。由於呢度唔容許影相，就等我用文字為大家介紹下啦。 杜如風小姐介紹大家買呔、BUMPER之類既大型用品，呢樣大家自己考慮喇，因為計番兌換都唔係平得好緊要，只係有啲款香港無咁解。 而細細件既汔車用品佔左呢度五六行走廊（即相中黃色一行行既地方），淨係點煙器一開幾、或者點煙器轉USB都有幾十款比你揀。比較吸引我既係倒後鏡之類既野，又係有幾十款比你揀。其餘杯架、電話座、洗車用品、噴窗防水既東西呢度乜都有。就好似去左一間實體既淘寶一樣。 價錢方面，一定貴過淘寶，論價錢淘寶係無得輸的！同香港既汔車用品鋪比較，呢度會因為兌換既關係而平少少，唔會平好多。不過勝在多款揀，又唔係遠。所以好值得車迷過黎。 最後要提下大家，呢度係日本，所以只會搵到日本車既野。好似筆者部Smart咁，呢度就無補品岩用喇。 圖：由作者提供