上一集帶大家玩左LegoLand，又食埋和牛。今集我地繼續喺台場玩，先有尋找高達的故事。之後就帶女士們去行Venus Fort商場。依傢睇番上集個地圖先。

上集講過啦，除左無人駕駛火車白合海鷗號之外，仲有JR+TWR線可以黎到台場，而下面呢張相就可以睇到呢個地鐵站既出口，同埋旁邊嗰條天橋。

而我身後就係Venus Fort商場同摩天輪喇。

尋找高達的故事

當大家面向住Venus Fort既時候，向你既右手邊望就會見到下面呢個商場。

呢個商場叫Diver City Tokyo，入面有大家香港都行到悶既ZARA、Forever 21同H&M。所以行唔行都無乜所謂，呢個商場唯一一個好處係地下有個大Food Court，全台場黎講食野呢度最平架喇。

講左咁耐，究竟高達喺邊呢？原來因為高達像係面向海既關係，所以你只要入到黎呢個商場，搵到Food Court既話，用Food Court既側門一出去就見到架喇。

Venus Fort

Venus Fort係一個裝修到好似澳門威尼斯人既商場，呢度有好多特別少少既商鋪，例如Village Vanguard、Kiddy Land，地下仲有間大型電器鋪同埋專賣狗仔衫既鋪頭。呢度樓高三層，頂樓係OUTLET，印象中係好多化粧品牌子的；中間嗰層叫GRAND，即係好似威尼斯人嗰層；最底係FAMILY，即係賣電器同狗仔衫既一層。

台場摩天輪

黎得台場，好多情侶都會黎玩摩天輪。前往摩天輪好近，穿過豐田城行幾分鐘就到，唔怕高既話，仲可以等得4卡既全透明車箱添。摩天輪既下面仲有間大型機鋪，筆者每次去都會入機鋪玩好耐先走。睇相先啦。

電車Go!呀！！香港無得玩好耐架喇！呢度仲有好多夾公仔機，同埋足球機（如下圖）

下個星期就會係車迷SPECIAL，會介紹Venus Fort旁邊既豐田城MegaWeb同埋杜如風小姐都介紹過既東雲汔車用品超市。下星期日既HKG報見。

圖：由作者提供，地圖取材自谷歌地圖

 

投票已截止，多謝支持