又黎到東京篇，一開始會一連三集為大家介紹台場。台場係一個非常適合一家大細去既地方，因為呢度充滿新奇刺激既野，有小朋友鍾意既高達、爸爸鍾意既豐田城（睇車的，仲可以免費試渣添！）、媽媽鍾意既蠟像館同埋摩天輪，總之寫極都寫唔晒。大家睇下下面個地圖就明點解我寫得咁辛苦，真係想搵個位寫野都無。（中間紫色既係一橋行人天橋，連接住台場既兩端，步行約5-10分鐘，極之方便。）今集我會先介紹地圖上半部既景點，仲會帶你食A5和牛同任食壽司。正！

前往台場既交通方法好簡單，只有兩種鐵路可以去到。

白合海歐號

第一種係無人駕駛列車白合海鷗號亦即係地圖上面淺藍色繞住台場黎行嗰條線。白合海鷗號既好處正如地圖所示，佢係服務台場遊覽既乘客，所以有好多個車站，而每個車站都好接近各個景點，佢仲有一回無限任搭既一日券比你買，想去台場玩一日既話記得買，成人票價係￥820。不過說實話，佢單程既車費已經比平常既JR貴。搭幾個站已經要五百日元，不過佢係唯一一條會行經彩虹橋既鐵路。所以幾貴都好，筆者都幾推介你搭白合海鷗號前往台場，順手喺彩虹橋上面向海影番幾張相補番數啦。大家可以搭JR山手線前往新橋站（轉白合海鷗號）直達台場各景點；或者搭私鐵線前往汐留（轉白合海鷗號）去台場。

埼京線直通

而另一種前往台場既方法，係筆者常用既方法，平靚正！就係搭JR+TWR線，即係又稱埼京線直通。埼京線直通可以由池袋、新宿及澀谷方面直達地圖正中央既 Tokyo Teleport站。由新宿出發車程約30分鐘，比搭JR山手線轉白合海鷗號快一倍。缺點當然係佢距離景點比較遠，而且全個台場只得呢一個站，去邊都要行天橋穿黎穿去。不過回程趕返酒店搭就的確唔錯，夜晚十一點都仲有車，唔駛趕。不過咁，如果大家想去杜如風小姐介紹過既東雲汔車超級市場既話，就一定要搭呢條線。（超市下下集會介紹）首先介紹第一個景點，Decks Tokyo Beach。

Decks Tokyo Beach 呢度係台場其中一個大商場，一般來說，黎得台場，Decks Tokyo Beach同旁邊既Aqua City就必到架喇。因為行街食野都集中晒起呢度。否則就要行過去摩天輪嗰邊先有另一個大商場Venus Fort，又或者去高達旁邊個商場食Food Court。不過如果講食野同普遍程度都係行Decks Tokyo Beach啦，今集仲會介紹啲正野你食添呀！

先講下Decks入面呢間Joypolis先，如果用機鋪黎形容佢就實在太過睇少佢。幾年前去日本時筆者有入過去，入場費唔平的，入場費連全日任玩要￥3900，五點後入場平少少，只需￥2900。入到去絕大部份機動遊戲都係免費任玩的，無錯，係機動遊戲。裡面樓高五層，有室內過山車、動感遊戲，仲有全球得三部（喺晒呢度）既實物原大頭文字D。喜歡打機既朋友，唔好錯過。嫌貴既可以下午或夜晚先入去，由於佢係無限任玩既關係，所以越夜入場收費會越平，但係入面排隊既人當然會越黎越多。

Legoland 及 蠟像館

蠟像館香港都有所以今集唔多介紹喇。想去同大島優子影相既話就自己去啦。筆者今次介紹大家去Legoland，裏面唔算好大，但係越對夠晒驚喜。如果大家想慳錢既話，筆者影左好多相比你睇。

從相片中大家可以睇到，車同船都係識行既，另外你一路睇佢係會由日轉為夜，之後街燈招牌都會著，再過一陣又到番朝早。呢度無人會趕你的，影相拍片都可以。另外，呢度有一個好小型既機動遊戲，仲有間迷你戲院睇LEGO卡通的。呢度仲有間小食店，食下熱狗同飲可樂咁大把。如果你帶埋小朋友黎會開心啲，因為呢度有個位係有無限LEGO比你砌的，否則好似我呢啲年紀大既人黎，慢慢行，慢慢影，一個鐘內點都行完。臨走前記得買番幾盒LEGO走，因為呢度有部份MODEL外面係買唔到架！

豪食A5和牛

離開Legoland，上到六樓，就會見到呢間放燒肉放題醍醐，呢度主打係和牛。唔貴的，同香港比簡直係平，如果你好食得既話可以揀佢既任食放題，好似四百蚊港紙左右一個人，但係和牛只係A4級數。如果你想食最高級既A5和牛，就要學我咁散叫。

呢度環境一流，仲可以望住彩虹橋黎食。上圖嗰碟係七色和牛，係七個唔同部位既和牛，基本上係必食推介，記住個次序黎食，好食嗰樣轉頭加單淨係食嗰一味，再加少少雜菜或者冬菇咁其實已經好飽。兩個人食散叫既話，約港幣一千元埋單，算平架喇。香港淨係食七色和牛都已經幾百蚊了。

杜如風推介任食壽司

唔食牛既朋友，可以落一層去到五樓既築地玉寿司食壽司。杜如風小姐都推介過呢個壽司鋪架，呢度男士每位￥4500，女士每位￥3500就可以任食任叫。係連貴價既海膽壽司都可以任叫任食架！由於我無入去食，亦無影相，留番個網址比大家啦（http://www.tamasushi.co.jp/contents/hp0042/index00280000.html）。

日劇迷必到富士電視台總部

如果你都鍾意迷日劇既話，當然要黎富士電視台總部入面參觀下啦，入面有好多富士電視製作既電視海報同紀念品賣，就好似當年香港既YES! SHOP咁。仲要係免費入場，仲想點？入去睇啦！！

VS嵐呀！因為香港J2有播日劇同日本綜藝節目既關係，令到呢度多左香港人去。除左VS嵐同埋交響情人夢之外，當然仲有比人惡搞埋既矛盾對決啦。呢度有幾個場景係可以比你扮主播影相的，不過筆者唔靚仔唔POST了，另外大家會見到上面有張相見到一條好短既日式古裝街，都可以比大家影相的。可能你去到會問，點解明明免費入場，但係地下同七樓都會有人叫你買飛既呢？原因係，如果你想上去25樓既球型展示館的話，就要另外購票，票價￥500.有咩特別？除左可以居高臨下咁睇下台場之外，仲有一份紀念品送番比你（唔知毛巾定貼紙了），由於我無上到去，所以等大家去完再話我知啦。

今集講到呢度已經好長喇，下集會帶大家去台場既南半部，行下女士最鍾意既商場Venus Fort，仲有男士最鍾意既高達！跟住再下個星期就會係車迷SPECIAL，會介紹Venus Fort旁邊既豐田城MegaWeb同埋杜如風小姐都介紹過既東雲汔車用品超市。下兩個星期日既HKG報見。

圖：由作者提供，地圖取材自谷歌地圖