聖誕新年打算去東京玩既朋友，記住留意由今日開始既東京篇喇。第一集會同大家介紹下東京兩大機場（成田機場及羽田機場）既交通資訊先。

成田有幾遠？羽田有幾近？

雖然地理位置睇，羽田機場係近過成田機場多多聲。但係講交通方便就的確係成田多車揀一點，不過因為路程較遠所以一定會比較貴。羽田機場一般黎講都係搭MONORAIL（單軌鐵路）去濱松町站轉JR山手線去沿線目的地。MONORAIL車程約20分鐘，但係再轉JR山手線去新宿又要多24分鐘。咁轉車等車都要50分鐘左右了。而今時今日，成田機場推出左Skyliner特急列車，由成田到日暮里站都係37分鐘，再轉JR去新宿都係20分鐘。所以似傢黎講，時間不會相差太遠。以下有詳細既介紹： （由於JR官網無好靚仔既地圖，而筆者又唔想偷人地BLOG既圖，所以只可以用我有限既小畫家黎畫。先講明唔岩比例的，大家知道大概既停車站就可以，請見諒。）

羽田機場往市區

上文提到，羽田機場出市區最好搭MONORAIL（單軌鐵路），由羽田機場出到濱松町站，特急班次車程約14分鐘，一般班次車程約19-24分鐘。去到濱松町之後，可以轉JR山手線，逆時針方向可以去到新橋（轉百合海鷗號去台場）、東京、 秋葉原、上野；順時針方向可以去到澀谷、原宿、新宿、池袋。由濱松町計，搭JR山手線去新宿約24分鐘、澀谷約18分鐘、東京約5分鐘、秋葉原約9分鐘。基本上大部份旅遊點都可以經JR山手線去到晒，總車程都係一小時以內。車費方面，羽田往東京（單軌連JR山手線）要￥650、往新宿要￥690。 不過，逢星期六日及公眾假期係有單軌連山手線優惠的！ 只要你喺羽田機場，於售票機揀 500円山手線優惠個鍵就可以買到，唔駛去客戶中心，500円係包左你由羽田機場單程去山手線任何一個站落車。比就咁買單程車票平100-300円左右，好過無。不過要留意既係，無人會知你係咪搭山手線的，所以你搭中央線（快速），湘南新宿之類既快速班次都無問題，只要你係喺山手線沿線車站落車就可以。

成田機場往市區特快之選

成田機場有兩個快速舒服既方法出市區，京城電鉄旗下既Skyliner同埋JR旗下既N'EX。先講Skyliner，它是近年新建成的高速鐵路，時速達160km/h，所以最快可以約37分鐘出到日暮里。之後轉JR山手線往新宿約20分鐘、池袋約15分鐘、東京約15分鐘。單程收費￥2400。同羽田機場無得比的，快是要代價的。不過筆者知道東瀛遊有做優惠，每張飛平200日元，有需要既網友可以去問下。 如果你想平啲啲，慢少少都可以的話，可以搭Skyliner的普通版 - 京城電鐵。約70分鐘到上野，車費每人平大約￥1000。路線同Skyliner差不多的，只係中途要停站咁解，目的地都係去日暮里或京城上野（上野）。

成田機場往市區豪華之選

N'EX 係JR公司既機場特快列車。雖然叫做特快，但係事實上唔係好快，成田去新宿要104分鐘，去東京要81分鐘。不過好處係豪華同方便，N'EX有香港機場快綫既質素，加上係唯一直接去到東京同新宿等地區既鐵路。仲有部份班次係可以直達橫濱咁遠。所以貴一貴都有咁多遊客搭，N'EX中途站有：東京、品川、澀谷、新宿、池袋同橫濱。 話明豪華，價錢當然唔會平，由機場出發單程往東京已經要三千幾円。所以記住一定要買來回優惠車票！只需4000円就可以在14天內來回機場各一程。平一半有多，不過缺點係只係得來回有優惠，單程係要散買的。所以單程既話搭Skyliner好了。 講番來回優惠車票既購買地點，（我假設大家都係第二航廈落機）喺成田機場二航廈地庫（即係搭JR的樓層），一出電梯就會見到下面呢塊版。（係要寫明旅行服務中心呢個先係旅客用的），其餘機場各層既JR服務中心都只係服務當地人，無來回優惠票買架！ 買既時候，要出示旅遊證件先可以買到。一本護照只可以買一張，以下係來回優惠車票既詳情： 只要你由成田機場出發，就可以到東京市任何一個JR車站落車，去到最遠可以到達大宮、橫濱同埋大船都得。不過唔單止咁，其實你只要唔好出閘，就可以任你轉JR旗下任何市區路線於東京市內任何一個站落車。例如原宿、秋葉原、甚至係奧多摩都得。呢一個安排係方便大家去非N'EX 停站既地方既，但係一定要記住唔可以出閘，食左你張票你就要再買票架喇。跟住, 14天內，同樣可以由JR旗下任何一個站上車，唔出閘咁轉N'EX去機場。 下一集，筆者會為大家簡介下東京既鐵路，方便大家PLAN行程，仲要介紹幾種JR PASS比大家參考下，了解下唔同PASS既功用。下星期日見。 圖：由作者提供，部份相片轉載自京成電鉄及JR東日本網站  

投票已截止，多謝支持