有人感慨「香港撞邪」，要不然怎麼連救急扶危、社會地位崇高、揾錢能力超強的醫生，疑當值時take嘢致神志不清，被同僚捉去驗尿後證實體內含有大麻；此外，早前有單男護士疑追更過勞至猝死，警方事後在男護士家中檢獲冰壺，則其猝死或有他因，事情確實令人感慨萬千：香港要不是撞邪，都係世道衰微，妖氣充斥，否則怎會上演「迷幻醫護」嚇鬼死人啊！

講開又講，除了迷幻醫護；又有教授布局殺妻誤殺埋嗰女；又有法官判案「應告不告」放生擲「臭魚三文治」襲擊時任特首梁振英，咁都上訴得直，試問司法又如何彰顯公義？屈穎妍乃有〈一介草民的問號〉（請按此重溫），屈小姐為文深入淺出，大道理經她妙筆一揮，讀者無不拍手叫好，她不必亂拋拉丁文、胡亂叫囂，暗箭虛發企圖傷人，只是平心靜氣，看似毫不費吹灰之力，就條暢理析，教一眾粉絲看到爽歪歪！

屈穎妍不說法官撞邪，她只是用幾個問，就教人認識法官的「官不稱位」和「職不稱能」，試看其第一問：因為梁振英成功閃避，故吳文遠的三文治擲到了保護特首的G4。法官認為，G4明知三文治不會打到他，卻主動去擋格，而投擲者亦沒有襲擊G4的意圖，故不構成普通襲擊罪。簡言之，就是G4太勤力，抵你死，擋咩呢？但如果，這次G4擋的不是三文治，是子彈呢？

這真是發人深省的「大哉問」！吳文遠「脫罪」不是彰顯司法的公義而是反映法官判案頭腦欠邏輯思維，要言之就係戇居！而律政司不就此案提司法覆核，就是撞邪！就是神智不清，香港這福地，都被「迷幻」了！

社會充斥反智廢話

香港近年充斥反智的廢話，好似「理大社會政策研究中心主任」鍾劍華，佢不時在爛果報指天篤地，「我舞影零亂」，日前又話「白色恐怖瀰漫全城」，真係九唔搭八，原來佢係受到被罰停學一年的理大學生會前會長，在集會呼籲所有人「在白色恐怖下不要懼怕」所啟發；鍾劍華就話喇：「這番充滿滄桑感的話出自一個只20歲出頭的青年人，香港人沒有理由不為此感到難過。」

真係唔好意思，筆者只係好似吳文遠暴力擲三文治都可脫罪咁笑到眼淚水都飆，「在白色恐怖下不要懼怕」，應該係對跑去日本靖國神社外，焚燒東條英機道具神主牌嘅「忽然愛國」的郭紹傑和嚴敏華講的。香港玩政治，安全過抬炸彈！衰咗，仲可以好似黃痴瘋咁又告警隊一哥又向懲教處索償，幾咁威風過癮！鍾劍華，虧你仲好意思掛個乜鬼「社會政策研究中心主任」，應是「堅尼地研究中心主任」較貼切吧！一個「中心主任」被一個二十出頭的青年人「滄桑」廢噏感染到不顧事實亂下定論，「白色恐怖瀰漫全城」？香港幾時落過雪啊？講嘢！如此感性，應該寫都市浪漫愛情小說，研究乜鬼社會政策啊，嘥氣兼嘥時間！

冇計，回歸後香港淪為低智城市，「專業人士」，原本應是社會叻人，唔係撞鬼，就係撞邪！筆者不禁亦要學古人仰天長嘯：誰來救救香港？

原圖：Now新聞截圖