侵侵又要為自己的蠢事埋單！美國政府局部停擺差不多三個星期，只因侵侵總統企硬要在美墨邊境興建圍牆。民主黨自然唔肯過佢，誓死唔過臨時撥款；一意孤行的侵侵則恐嚇要宣布緊急狀態，以繞過國會拿錢建圍牆。面對人為困局，美國人把矛頭直指侵侵，嚇到侵哥騰騰震，於美國時間周二(8日)的全國演說中雖然企硬起牆，但就肉酸跪低，唔敢再宣布緊急狀態。

民眾矛頭直指侵侵

政府局部停擺，美國人婚結唔成，獄卒冇假放兼睇住囚犯刷牛扒，全國退稅分分鐘退唔掂，梗係天怒人怨。更嬲的是，原因完全是黨爭誤國，或曰笨總統累街坊，根本可以完全避免。 一如以往，侵侵在演說中把邊境難民問題有咁恐怖吹得咁恐怖。他強調興建圍牆好緊要，原因是(或曰「被他包裝成為」)南部邊境人道安全危機加劇，威脅上百萬美國人，故他希望結束這個困局喎。 侵侵企硬興建圍牆，以為將自由民主的美國包起來就可以保護國家，邏輯相當有趣。更有趣的是，他聲稱是應民主黨要求而不建石屎圍牆，改建鋼鐵圍牆，盛惠57億美元(約合444.6億港元)，真係從善如流喇。他又不忘大數民主黨唔批錢建圍牆嘅「衰嘢」。

改用鋼鐵從善如流？

對於這種水平的理據，民主黨一干人等梗係唔滿意，大罵難民問題由侵侵一手造成，還批評侵侵拿美國人做人質。民主黨要求侵侵先恢復政府運作先好諗圍牆問題。 睇住民主共和兩邊的蛋散拿國運開玩笑，拿國民當子彈，小編遠在太平洋彼岸都笑到痙攣。美國人連政府都轉唔郁，也許是可憐的，但這種可憐是你們一意孤行選侵侵做總統造成的，怨不得人。 原圖：無綫新聞截圖、網絡圖片 http://www.1zoom.me/zh/wallpaper/512910/z6497.9/

投票已截止，多謝支持