滑鼠喺電腦輕易點幾下，就可以「複製」、「貼上」(copy and paste)幾百字甚至幾萬字。呢個功能我哋一直都覺得普通不過，不過原來大約50年前根本就冇，啲人係用打字機打字，一份資料打十份副本，就要人手打足十次！直至女工程師貝賴津(Evelyn Berezin)發明第一台電腦化的文字處理器(上圖黃圈示)，當中有「複製」、「貼上」功能，簡直係所有文字工作者嘅救星！然而呢位救星喺本月8日因病逝世，享耆壽93歲。我哋就重溫吓佢嘅發明點影響呢個世界喇！

當年一頁有錯全頁打過

1969年，係值得銘記的一年。貝賴津就係呢一年發明人類史上第一台電腦化文字處理器「資料秘書」(Data Secretary)。呢個發明出現前，秘書主要工作就係打字，一份文件如果要十份副本，就要人手打足十次。如果一頁中有一粒字打錯，該頁就要重新再打過，簡直係無間地獄！ 貝賴津本身喺打字機設計公司返工，可能因此更明白打字嘅痛苦同唔方便，所以佢後來離職創業，發明「資料秘書」。呢個新發明喺最初時足足有1公尺高、速度慢兼好鬼嘈，不過當然呢啲缺點都係以宜家嘅人目光去睇，喺當時來講已經十分先進。

Microsoft Word前身

呢台機器做到以前從來都無嘅編輯、刪除、複製及貼上功能，成為文字工作者嘅救世主之餘，仲被認為係Google Docs和Microsoft Word嘅前身。 當你用緊電腦或者電話同朋友傾計，不妨分享呢篇有趣小知識畀佢知！ 原圖：網絡圖片

投票已截止，多謝支持