現任特首林鄭月娥已經上任近10個月，各界對她的批評愈來愈多，最主要的問題是——無為！咩都唔做。 香港的社會民生問題，最大的莫過於土地房屋，正如前特首梁生所說，一切都是土地問題。林鄭上台前亦都在這個問題上大大聲，不過上任之後，成立了一個土地供應專責小組之後就萬事大吉。早前，林鄭在立法會都承認，自己在房屋問題上未能回應市民期望。連特首都投降了，難怪有超過16萬人走去搶居屋，就算癲價都照搶。因為連特首都話無計，而且只是淡淡然一句「未能回應市民期望」，面不紅心不跳。咩叫「未能回應市民期望」，簡直是失職、失責，令廣大市民大失所望。

房策無為 市民失望

其實大家回憶一下，林鄭上任10個月，做了什麼？土地房屋，一切等土地小組，「期望社會可以務實討論土地供應專責小組即將出台的公眾諮詢」。唔係啊嘛？大姐！社會期待你可以出絕招「女媧補天」（李嘉誠在特首選舉投票前說希望新特首像「女媧補天」），你反過來期望社會給你答案？林鄭這個說法令我聽來很心寒。香港過去20年都對土地問題無共識，我實在想不通為何現在會有共識，無共識是必然的。期待社會？我睇林鄭你不需要期待了，社會如果有答案，使鬼你排除萬難啊。因此，林鄭這個說法，等於將個波踢返給全社會，事先聲明：唔使旨意我會在土地問題上有咩作為。 不要說土地房屋這些硬骨頭了，其他嘢，林鄭又做了什麼？發展創科是日日講，但迄今看不到有咩新政出來，創科局做了什麼？在互聯網時代，一個初創企業，是龍是蟲，10個月都已經睇到好多嘢。騰訊由被雷軍搞米聊衝擊，到研發微信反敗為勝，都只不過是驚心動魄的幾個月。這個政府的龜速，似耕田多過搞創科囉！ 再簡單啲嘅，交通津貼，一公布說人人有幾百蚊派，然後什麼紅VAN、邨巴吵了一大輪，爭利益。爭完之後，究竟幾時推出？無人知，快嘅話明年吧。如此簡單的派錢都要搞兩年啊？奶媽你一共做幾年啊？有幾多個兩年可以揮霍？ 強積金對沖，講到事必要做。我一聽到話最快2022年先可以落實，當堂爆粗。以特區政府的斑斑劣跡，她話4年起碼預3個4年，就是12年，到時我都退休了，關我X事。哪怕是一個4年，堂堂13億人口大國，到時都由大國走向強國了，你先做一件咁芝麻綠豆嘅事，真係死得人多。 不如我們對比下，林鄭上任10個月，中美兩個大國做了什麼？美國千億稅改、退出TPP、修改移民法律、邊境建圍墻、想廢奧巴馬醫保、開打貿易戰，隨便一件，在龜速特區大概都要50年才能完成。中國修憲、房地產新政叫做控住了一線城市樓價、便利港澳居民內地生活措施、雄安新區、粵港澳大灣區，隨便一件，在龜速特區大概都要100年才能完成。

頻赴立會 答問無謂

不過，林鄭有一件事倒是很積極去做的，那就是跟反對派一起「攪和」（意為攪拌調和，形容明知沒有結果，仍然跟一些人不斷去攪局）。最突出的表現，就是每月都出席立法會質詢短問短答。以前特首一年只不過是去三幾次立法會，林鄭嫌少，話要「大和解」，個個月都去接受質詢。 本來，如果立法會是正正常常促進和監督施政，多溝通是好事。但大家都知道反對派在立法會搞咩嘅喇，你上到去，問來問去就是那些，說到底都是反對與內地融合，一地兩檢？違反《基本法》喔；港珠澳大橋？唔好起啦，大白象；你今次講嘅嘢同以前講嘅有出入喔，係咪轉軚？真係聽來都嘥氣。明知道反對派就係不斷糾纏一些毫無意義嘅嘢，希望拖死政府，你林鄭還走去配合他們演戲，這等同是一種拉布，不是拉立法會嘅布，而是林鄭和反對派唱雙簧，拉香港進步嘅布。 林鄭一提出「大和解」，我早已在其他地方發文談及：「大和解」是偽命題，根本不可能。我後來也在本網談及，反對派的核心價值就是反中、恐共。大和解？非不為也、實不能也！

此刻香港 死局難解

問題來啦，點解會有人選擇咁樣做特首？我是咁理解嘅（只是我的理解，如與事實相符，實屬悲劇）：一是要令中央覺得我好跟隨中央步伐，因此經常北上學習參觀，而且態度謙卑；二是要令反對派少啲直接反我嘅理由，令反對派的支持者少啲子彈，因此演「大和解」嘅戲；三是千萬不能觸及既得利益者，不能做任何改革，反正有人反對就放棄吧。為了確保第三點，最好的辦法就係盡可能將時間都花在前兩點上。所以，君不見上台10個月以來，特首不在香港的時間實在太多，雖然我無詳細統計，但感覺她經常北上，然後一回港，我最經常見到她在香港的活動，就是去立法會「大和解」。做實事？會促動既得利益嘅喔，唔好玩啦！所以我要扮到好忙好忙，至於那些實事，我會好似好有誠意咁，成立一個又一個專責委員會，等委員們去跟進嘅喇。咩話？如果委員會無結果點算？咁咪成立委員會2.0、3.0去繼續跟進囉，反正我們很重視每一個人嘅意見，務求大家都滿意。這個做法很聰明：三點入面，前兩點只要擺姿態，就可以攞分領功，後一點，無為便是無過。你懂的。 講真，搵我做呢個特首，我都係咁做，否則一定死。此刻的香港已經是一個死局，無得救！ 原圖：林鄭月娥Instagram https://www.instagram.com/p/Bgi79fiHmtn/?taken-by=carrielam.hksar

投票已截止，多謝支持