立法會修改議事規則的結果，應該這兩日就會揭盅。反對派拉布的招數推陳出新，還發明出言侮辱一招，希望挑起口角。民主黨主席胡志偉14日就提「狡兔死、走狗烹」，指謝偉俊「作為走狗的一部分」，我聽到第一時間的反映是：胡志偉你咁講好蠢，他是走狗，你就是狡兔，言下之意，你死先過他，你胡志偉都還健在，謝偉俊你怕咩啊？ 不過建制派一貫好認真，動不動就暫停會議討論一兩個鐘，其實這算不算是一種配合拉布呢？例如之前陳志全提出休會討論南京大屠殺，又暫停會議討論，使唔使啊？反對派擺明玩嘢浪費時間，認真你就輸啦！口才好可以潤返他，口才唔好就當他發噏風。 平心而論，反對派的所作所為，其實都是在發揚香港文化，或者說廣府文化，香港人、廣東人都有一種文化，喜歡玩嘢、玩爛gag，無厘頭，現在反對派就是全面發揚這種文化。故意不簽確認書去參選人大，一個日日宣揚港獨的人突然宣佈擁護習近平新時代中國特色社會主義思想，陳志全突然愛國說要討論南京大屠殺，這些做法不是玩嘢是咩？你是一個咩人，不是看你一時的言行，而是日積月累下來的，太反常一定是別有用心。更何況，郭家麒、楊繼昌、陳志全這些人，他們做這些事之前，已經講明其目的就是為了彰顯所謂「制度不合理」，又或者是為了拖時間等等。

下一招會否是屙屎？

點人數、休會動議、提出其他議案、攻擊其他議員、要求立法會主席避席，咩招都出齊，明天還有咩新招？我倒為反對派想到一招——屙屎。呢招其實都是學周星馳電影《食神》的，唐牛要巴結討好史提芬周，史提芬周叫佢：即刻喺電梯口屙篤屎嚟睇吓先講啦！唐牛就喺電梯口踎低除褲，口擔廁紙，咁樣先得到史提芬周的信任，後來先可以成功做臥底打倒食神。既然攻擊其他議員搵交嗌都出埋囉，下一招肯定要再邋遢啲啦。搵個人衝上出主席台前面屙屎，立法會起碼又要暫停會議一頭半個鐘來清理翻個場，到時可以換個人上去再屙，又拉一頭半個鐘。咁樣一來，廿幾個反對派議員，輪流上去屙，一日好容易拉十幾個鐘啦！聽日？聽日食完飯又可以再屙過。 咩話？你覺得屙屎會被逐出會議廳？議事規則無規定唔可以喺會議廳屙屎喔。食同屙係人最基本的生理需要，你咁講話這是不雅？咁有本事你唔好屙啊。反對派還可以藉機提出休會動議，先討論一下是否可以在會議廳屙屎呢個重要問題。好無厘頭？反正都是為了拖時間，唔爭在粗暴啲，將無厘頭進行到底。畢竟，無厘頭已經是反對派最後的武器了。 如果明天真係有反對派議員走去屙屎，唔使多謝我，呢招我醒你嘅。

剩下玩嘢顯無力感

玩嘢、爛gag，無厘頭，講真，我平時都是一個咁樣嘅人，周星馳那個時代的電影更加是我們這代人的集體回憶。但是這些戲劇化的做法，拍電影可以，作為生活的點綴也可以，但如果你工作、生活的全部，就剩下無厘頭的玩嘢，這事實上反映出你的無力感。你已經無能力去切切實實推動什麼、成就什麼，而只能夠通過這種方式來阻住地球轉。這種無力感，我相信擊中反對派人士的心窩。沒辦法，中國日益強大，國家明言要強化對香港的全面管治權，當反對派要不斷出無厘頭招數來對抗這樣對抗那樣，是趕自己入窮巷，結果應該已經寫在牆上。不要誤會，我不是在歌頌中共政權，但我自問是唯物主義者，歷史的發展，是不會問你喜歡不喜歡的。 原圖：Now新聞截圖、YouTube影片截圖

投票已截止，多謝支持