民主黨黨員林子健的「肥腿二十一口釘」峯回路轉，瞬間，佢由投訴人變成疑犯；一夜之間，一齣大爛片變成大悲劇，更涉及民主黨誠信問題。試想想，若然民主黨為了抹黑高鐵一地兩檢而出到如此下策，整件咁低能勁搞笑嘅「釘釘你嘅肥大髀事件」，咁民主黨今後還有甚麼道徳高地可踞來抺黑所謂「跨境執法」？林子健呢個自稱「目不職丁普通死肥佬」，佢嘅「釘釘」行動，亦可說是歪打正着，小小幾口釘發揮大大作用，令民主黨本已低賤嘅民望，經此殘酷一釘，今後更難翻身矣！這不知道算不算是「一釘促成千古恨」！ 涉嫌提供虛假資料誤導警務人員嘅「普通死肥佬」，一開始老作被「強力部門」擄走，被問多兩嘴，已經語無倫次，一時話自己好怕死；一時話自己感恐懼，會收聲；一時話自己無結怨無賭錢又無欠卡數和無妄想症，我信，我真係信！之後佢又話第一時間冇想過報警，反而是想到李柱銘和何俊仁兩位黨友，難得兩位黨大佬咁信任呢位咁鍾意玩釘釘嘅肥黨員，「畀強力部門人員在砵蘭街強行帶走、禁錮及毆打」，於是來不及去醫院及報警，老虎都要開記者招待會吐吓苦水申訴吓一國兩制名存實亡！內地公安無法無天！那怕被眼尖的市民譏其痴痴呆呆坐埋一枱！

借題發揮 盲反一地兩檢

從林子健被「強力部門」擄笠事件，一眾為反而反高鐵一地兩檢嘅反對派，好心唔好跟車太貼變成豬隊友，郁啲就話「疑似國安肆意在港捉人打人，無法無天」、一時無病呻吟「香港人還能免於恐懼的自由嗎？」正如有心水清者話齋：唔用中國法律你就驚！九七人人都驚駐軍，回歸二十年後，阿哥，你有冇見過解放軍行差踏錯？沖繩美軍反有搞日本人，但解放軍未聽過有影響過香港市民嘅日常生活。一地兩檢講到街知巷聞，怎會越界執法？反而冇講明嘅，好似銅鑼灣同中環都可以「隔空施法」，是以一地兩檢同「跨境執法」根本沒有一毛錢關係。 反對派再用苦肉計抹黑一地兩檢，除了搞吓娛樂至死嘅「含笑半步釘」、「定驚鎮痛魚柳包」（屈穎妍妙喻），實在搞唔出似樣嘅花臣；慳啲吧！大多數港人要高鐵一地兩檢，咪再玩釘釘小兒科啦！咁辛苦得出嘅結果就係「自欺欺人被人欺」七字真言！「目不識丁普通死肥佬」你要收聲，想立刻去美國讀書，恐怕暫時要拖住。一如有網友話齋：千祈唔好走咁快，咁辛苦拍咗一部自編自導自演嘅港產懸疑驚憟片，點解唔睇埋個票房呀！ 筆者亦誠心希望林子健「經一釘，長一智」。願神保佑你！願你未去美國讀書時，先學會一些常識。 原圖：無綫新聞截圖

投票已截止，多謝支持