多得一場冇乜人知嘅市政府物業拍賣，一對華裔夫婦成功投得三藩市其中一個豪宅區的私家路。冇錯﹗真係成條，而且僅僅花了9萬美元(約合70萬港元)。這些機會不是屬於我的，磚頭都冇塊嘅小編真係酸到入心呀﹗

該條私家路名為Presidio Terrace，呈橢圓形，環境清幽，街坊非富則貴，眾議院民主黨領袖佩洛西、民主黨加州參議員范斯坦等人均曾居於此。而且街道有「實Q」睇住，私隱護到足，不怕閒人騷擾，可謂富人恩物。

買家是一對夫婦，太太Tina Lam香港出生，老公Michael Cheng則生於台灣。有今生冇來世，能夠賤價買起整個路段的行人路、行車路及所有公共區域，她們兩公婆坦言非常幸運。

街坊30年冇交稅 造就賤價拍賣

一切原因，源於連串漫畫式蝦轆，造就了這場「傳奇」。原來，過去30年，該區業主委員會一直欠交每年大嗱嗱14美元的房產稅，前前後後，連稅、罰款及利息，盛惠994美元，即唔使港幣8,000蚊。市政府嬲得滯將街道拍賣，誓要拿回應得稅款，結果賣個90,100美元，都咪話唔「和味」﹗

但真正和味的是Tina、Michael﹗Michael身為「真．房地產投資者」，如何藉這條街搵錢，當然駕輕就熟。二人兩年前投得街道後，沒有高調宣布，反而靜雞雞盤算如何「收回成本」，與一堆代理人商量發財大計。傳媒幫他們計過數，單是出租街上120個車位的收益已經肥到流油，如果成條街賣返出去，究竟可以賺幾多倍呢？

小編為人計計數，七十萬元買120車位，每個不用六千港元。少少哋以香港五十萬元一個車位計，分分鐘值七千萬元！嘩，即係一本一百利，發啦！

富豪後知後覺 政府睬你都傻

富豪街坊們直到月前被問及有否興趣買回私家路，才知道街已賣。原本一切免費享用，現在泊架車都要收費，真係點只嬲豬咁簡單﹗他們向市政府發信，聲稱因為稅單上的會計師樓地址有錯，所以才會30年來沒有交到那每年14美元的稅。他們又向市議會請願，要求取消這場交易，甚至入稟控告Tina、Michael兩夫婦和市政府，嘗試阻止私家路再次易手，以免令情況更複雜。他們認為，市政府2015年拍賣時，有責任出通告通知區內住戶，一切都是政府的錯﹗

不過，當局似乎睬你都傻，直言自己跟足法例辦事，並指拍賣已經完成兩年，要取消難過登天，還說「三藩市九成九業主都識得準時交稅，而且Keep住update通訊地址」，串爆一干扮傻的富豪街坊。不管如何，相關審訊將於10月舉行，到時一切將有分曉。

話時話，「風水輪流轉」這句話絕對是至理名言。Presidio Terrace曾經是「白人限定地帶」，只有白人可以購置物業。直到1948年，法庭才頒令禁止這種種族歧視的做法。現在這對港台夫妻買起Presidio Terrace揸Fit，可不可以說是黃種人成功逆襲呢？

原圖：互聯網圖片