數吓手指，今屆特區政府仲有兩個幾月就玩完，新一屆政府正為組班進行得如火如荼。大家都知道，任何一個機構想成功或做出成績，都要有好嘅班底或團體，換言之，即係人才；所以，「慎選左右」的確十分重要。
過去一屆的特區政府，十三局嘅局長邊個畀人鬧得最多呢？唔使問阿貴，都會係人稱「吳得掂」嘅吳克儉。議員狂鬧、學校教師鬧、時事評論員鬧、專欄作家冷嘲熱諷的鬧，大鬧小鬧，漪矣盛哉！罵聲真可謂「史不絕書」矣！
最近教育界議員葉建源對一個「髪已白」冇得留低嘅吳克儉教育局局長，仲要痛打落水狗話佢「醜出國際」。唉，佢只不過唔識work smart啫，也許太著重每日睇三十本書而已，唔舉辦個會又何必無限上綱至「醜出國際」咁大陣象？「垃圾會」放着正經的民生經濟唔討論，一味拉布流會叫囂，其實係真正嘅「醜出國際」！
嗱！講開又講，連龜速讀誓詞、議員資格或面臨被DQ嘅劉小麗，都發揮佢嘅教學潛能，在立法會議事堂義正詞嚴狠狠的教訓吳克儉。小麗老師今趟有備而來，開足馬力搜尋晒世界上成功教育嘅模式，如芬蘭的「一視同仁，平等尊重」、德國的「多元選擇，自主人生」⋯⋯
最後，小麗老師「結案陳詞」，指控「香港教育是全世界最大的罪行，因為你們徹徹底底摧毀了下一代的生命⋯⋯吳克儉應該剖腹自盡」﹗
小麗老師睇嚟有點暴力傾向，吳克儉冇錯五年任內劣迹斑斑，又hea又變身「外遊局長」，總之，五年局長生涯好過癮，被人抦到滿天星斗魚蝦蟹，我相信佢若然不是「生涯」規劃得好，唔自殺（當然不會剖腹咁神聖）燒炭都可能患上抑鬱症，可見佢「困乏我多情」才不至於走上絕路！而佢都係香港教育出來嘅精英（金文泰中學、中大社工系）！
其實，香港公務員現任及過去的管治班子，全部出在「視學生為一口螺絲釘」嘅填鴨式教育，求學就是求分數，不操練，無以學。呢個「成王敗寇」嘅模式，港英時代冇事，何以一回歸就出事？真係弔詭！
我都唔想諸多猜度，其實乜嘢模式都有好有壞。針冇兩頭利，自主多元，玉不琢不成器都冇話邊個錯或對，教育離不開因材施教及愛心。吳克儉每月三十萬元人工，九成係被媽叉嘅忍辱費。我不贊成叫佢剖腹，活下來，豁出去！退休後真係要好好讀書，寫本《我如何任辱罵作賤依然可以愉快學習讀咁多書》，書名雖長如萬里長城，貪其夠吸睛，如此五年來一千八百萬薪酬，才算對社會有點回饋。克儉大師，翹首以待大作，屆時有勞讀書種籽幫我簽個大名。
投票已截止，多謝支持
返回
