【HKG訊】雞年伊始，人人都想發新年財，連激進泛民政黨都唔例外。社民連主席吳文遠農曆新年期間就到旺角砵蘭街、山東街交界擺檔賣熟食，美其名曰撐墟市、撐小販，實則同其他小販爭食，仲講到明話要為社民連立法會議員「長毛」梁國雄籌錢打官司添。唔知係咪因為社民連嘅年宵攤位銷情麻麻，搞到自稱「大將軍」嘅吳文遠要做埋小販嚟幫補長毛嘅訟費呢？ 長毛、劉小麗、羅冠聰同姚松炎宣誓時「玩嘢」，早前被政府高院申請司法覆核。吳文遠農曆新年期間，晚晚推架木頭車去旺角擺檔賣關東煮，話要為「長毛」籌錢打官司，仲喺Facebook發帖，聲稱自己係「撐墟市、撐小販」，呼籲網民支持。但有網民就揶揄吳文遠係「太平盛世，出嚟做show」，又有網民踢爆社民連賣40蚊「海鮮價」關東煮，係以「撐小販」為名，「掠水」為實，唔會幫襯。 圖：https://www.facebook.com/Ng.ManYuen/