印巴邊境空戰爆發，雙方出動過百架戰機，規模之大，被媒體形容為二戰以來之最。其中最受注目嘅，係中國製殲-10C成功擊落法國「陣風」戰機，據稱所用嘅係中國製PL-15遠程空對空導彈，射程高達200公里，呢款自2003年起喺中國空軍服役嘅戰機，廿年後終於喺實戰中證明實力。中國軍事發展近年突飛猛進，外界質疑聲此起彼落，更常被標籤為「紙老虎」。今次空戰正好畀咗個機會中國以實力回應。

時光倒流，當年西方幾隻鐵船就打到清廷割地求和，中國人淪為「東亞病夫」。而家，局勢逆轉，中國戰機擊落西方先進機種。話說北洋艦隊覆滅之時，中國同胞痛心疾首；而家殲-10C擊落陣風，華人振奮激昂。呢個唔單係技術上嘅勝利，更係民族自信心嘅重大突破。由被人輕視，到而家憑實力贏得尊重，全賴幾代中國人嘅拼搏付出。當年西方憑堅船利炮迫中國開埠，而家美國想用關稅同科技封鎖遏制中國。佢哋睇漏咗一點：今時今日嘅中國早已今非昔比，我哋已經學識自強自立！

據報道殲-10C之所以可以喺超視距獵殺目標，全靠機上嘅AESA相控陣雷達，唔單止可以提前發現敵人，仲可以引導導彈擊中目標，可見中國就連電戰都唔會輸蝕。好笑嘅係，面對如此顯著嘅中國軍事成就，仲有啲仇華分子死都唔肯面對現實，甚至將敗因歸咎於印度飛行員技術問題。但係實戰結果已經擺喺度，呢種鴕鳥心態實在可悲。無論美西方點樣施壓，中國都係堅持自強不息，呢個正正就係國家強大嘅根本。

今次之前，好多人都仲迷信美西方戰機有咩過人之處，其實睇返過去幾十年所謂嘅「實戰」，都係恰緊一啲冇防空、冇制空權嘅小國或者地方武裝組織，再加埋荷里活電影嘅大力宣傳，令到好多人真係以為呢啲戰機無敵。依家，佢哋終於遇到真正嘅對手，知道邊個先係「紙老虎」。

殲-10C喺印巴衝突中嘅戰績輝煌，徹底打破咗西方戰機「無敵」嘅神話，證明咗中國軍工實力已經可以同世界一流水平較量，據報已有多個國家表達購買意向，未來只會有更多國家轉投中國武器，擺脫對美西方嘅依賴。由當年嘅「東亞病夫」到今日嘅中國，我哋已經唔再係任人宰割嘅弱國，面對未來嘅挑戰，中國必將繼續堅持自主創新，為實現中華民族偉大復興而努力奮鬥。

（文章純屬作者個人意見，不代表本報立場。）