美國搵個癲嘅做總統，人民又點會唔跟住發癲？自從美國總統特朗普放風話要「打全球」，向N+1咁多個國家同地區徵收關稅，特別係對中國仲要加成34%咁多，成班美國人即刻瘋狂掃貨，趁加價潮來臨之前，大量囤積生活用品。此情此景，原本以為只會喺爆發疫情、戰亂時，先有可能見到，又邊有估到喺家陣呢個尚算和平嘅年代，竟然會出現好似末日咁嘅場景，只能夠話侵侵真係太有「本事」，人哋澤仔就話「no cards」啫，但侵侵就直接將一手好牌打到爛！

《華爾街日報》就生動咁重現返呢個類似《劫後餘生》嘅場景，超市同零售商店大排長龍，中國商品被搶購一空，據報紐約有個50歲嘅阿叔，周圍打電話問，搵晒成個紐約所有舖頭，就係為咗買部中國製造嘅電視機！仲有個億萬富豪喺社交平台度呼籲粉絲囤貨，由牙膏到番梘，乜都要買，以為真係世界末日，其實係特朗普玩嘢，但要由美國人民埋單。

最慘係啲經濟數據，高盛預測美國經濟衰退機會率由20%升到35%。我諗緊，特朗普係咪以為玩「末日級」關稅戰可以令美國重新偉大？但係睇嚟只會令美國人民嘅銀包更加輕咗。係人都知道平靚正嘅「中國製造」早就已經同日常生活密不可分，本費Ching嘗試問過DeepSeek，原來一部Apple嘅iPhone 16起碼有30%嘅成本直接同中國相關，包括組裝同零件生產，即係好有可能都喺特朗普關稅射程範圍之內，第時美國人想買部美國品牌嘅iPhone，隨時飛嚟我哋中國買更加平，仲可以順便買埋其他生活用品，扣埋機票錢都除笨有精，到時受傷嘅會唔會又係美國本土零售業呢？要令美國再次偉大，到底係「偉」定係「萎」？

未來一段時間，美國人將會面對更高嘅生活成本，特朗普嘅關稅政策，將美國推向一個極唔明朗嘅方向，如果呢個局面繼續惡化，難保唔會出現更大規模嘅社會動盪，事實上，美國當地4月5日已經有超過150個團體喺各地舉行超過1,200場示威，雖然示威原因唔係全部都關關稅事，但但經濟不景呢個原因就絕對走唔甩，當關稅影響湧現嘅時候，特朗普仲可以點樣收科呢？

（文章純屬作者個人意見，不代表本報立場。）