近日由台灣傳嚟一個大笑話，有報道引消息話，台灣陸委會拒絕咗其中一位「香港議會」參選人姜嘉偉留喺當地嘅「專案申請」，要佢即刻執包袱走人。對於呢位以所謂「黨魁」名頭「參選」嘅「大人物」，民進黨可以話一啲面都冇畀，搞到人哋要飛去日本，而姜生就一口咬定自己自己係「主動離境」，亦都冇違反當地逗留條件。實際係點，得佢自己心知肚明啦！

講開姜生，佢係咩背景呢？其實就係黃媒「Free HK Media」創辦人，之前自稱「姜牧師」，曾經坐過兩次監，一次衰襲警罪坐咗兩個月，一次衰串謀煽動罪坐咗八個月。出咗嚟之後成立咗一個所謂「香港民主建國聯盟」，自封做黨魁。最近仲要參選咩「香港議會」，話要建立「海外政權」喎。

呢位「偉大嘅」姜生，成日掛住乜乜乜黨魁名銜四圍博出位，但連個庇護都攞唔到，仲話要搞「海外政權」，真係笑死人！翻查記錄，佢上年11月仲要喺Facebook大大聲講：「有人攞住我哋嘅記者證，就攞到政治庇護。成立政黨後，我會準備出黨員證。」講到好威水咁，而家變咗流浪汪咋喎！

姜嘉偉可能以為自己坐過兩次監，就有強大嘅「政治光環」，但就估唔到連民進黨都費事收留佢嘥米飯，佢仲要死雞撐飯蓋，話自己冇「情緒」、冇「深深不忿」。講真，你而家連個容身之所都冇，又冇人肯出政治庇護畀你，仲扮咩堅強呢？喺台灣都企唔穩陣腳，仲話要搞「海外政權」？不如諗掂自己喺日本瞓邊先好過啦！話咩「選舉工作唔會受到任何影響」，連自己都安頓唔到，點搞選舉呀？

姜嘉偉呢種人，成日將自己包裝成「民主鬥士」，但實際上只係想博出位、博關注。佢哋嘅所謂「海外政權」，連自己嘅立足之地都保唔住，仲講乜嘢爭取「民主自由」？一個連容身之所都冇嘅人，仲妄想建立「海外政權」，真係天方夜譚啊！

（文章純屬作者個人意見，不代表本報立場。）