前立法會議員邵家臻早前（11月3日）突然公布患有胃癌嘅消息，需要緊急入院兼且切走半個胃同淋巴，仲要暴瘦咗足足15公斤咁多，本費Ching睇到呢單新聞不知幾心痛，即刻上番支香求神拜佛，保祐邵家臻長命百歲，千萬唔好有咩三長兩短，留返個殘軀見證住香港由治及興之後嘅未來。

雖然邵家臻符碌大步檻過，不過好唔好彩，原來11月2號除咗係佢出院嘅日子，仲係佢修讀基督教研究文學碩士嘅畢業典禮，他大嘆「奈何人在病榻，動彈不得，只能隔Mon 觀禮」，不過佢啲同學仍然好有心咁為佢送上畢業帽，等佢可以喺醫院戴返頂四方帽，影番張靚靚selfie相擺Facebook打卡。

其實邵家臻錯過畢業禮，就好小事嘅啫，最緊要人冇事啊嘛！佢已經比好多人更加幸福㗎喇，試回想2019年黑暴亂港，唔少後生仔誤入歧途，最終獲罪入獄，一判就三五七年嘅大有人在，有啲人更係要坐十年八載，呢班人錯過嘅，又點止係畢業禮咁簡單？

係，話就話坐監都可以繼續讀書、繼續進修，他日學業有成，一樣可以行畢業禮，例如《香港國安法》第一位被告「旗手」唐英傑，就喺完成咗懲教署為在囚人士提供嘅文憑課程之後，成功喺「立德學院」完成畢業禮。雖然佢冇錯過自己嘅畢業禮，但佢所錯過嘅人生，就真係點追都追唔返。正如唐英傑嘅後悔感言中提到，嗰啲「叫人衝、自己鬆」嘅人，依家都去晒外國享受緊「偷返嚟嘅自由」啦！至於喺邊度「偷」返嚟？咪就係一啲被捕後生仔，所錯過嘅人生囉！唔知邵家臻喺度呻嘅時候，左邊口袋會唔會feel到虛虛地，仲有少少隱隱作痛咁呢？

起碼家陣邵家臻都仲可以「隔Mon觀禮」，可憐有啲後生仔當初受人煽動，家陣只能隔住個鐵窗同柵欄去睇呢個世界，就算刑滿之後改過自新重新做人都好啦，錯過咗嘅人生就係錯過咗，所以幾時都話，做人做事都真係要三思，千祈唔好聽人老點，唔係隨時後悔一世吖！

（文章純屬作者個人意見，不代表本報立場。）