喺中國球迷間之間，有一個咁樣嘅笑話：「從來冇一支球隊，可以喺世界盃中擊敗中國隊兩次」，之所以話呢個係一個笑話，係因為國足喺咁多年嚟，只係成功入圍過一次世界盃咁大把，至於第二次？唔好講笑啦！中國人民族性強烈，但面對國足，連球迷都忍唔住自黑自嘲，呢份幽默從何而來？答案就係徹底嘅失望。

最近嘅世界盃亞洲區外圍賽中，國足對陣日本以0比7慘敗，輸係意料中事，但輸得咁肉酸真係令人啼笑皆非。無論係民眾定係官媒，都一致認為：我哋可以接受失敗，但絕對接受唔到「擺爛」！喺比賽中可以見到，國足球員係完全冇進入狀態，不斷犯低級失誤，既冇戰術，亦冇配合，冇搏命搶波，更冇身體對抗，擺到明就係放棄比賽。

國足嘅表現，真係可以接受？呢啲係我哋中國人應有嘅血性嗎？當然唔可能！

華為自從被美國列入實體清單後，不但冇退縮，反而迎難而上，加強麒麟晶片研發，推出自主操作系統鴻蒙OS，以減少對外部嘅技術依賴，並加大5G技術投入，積極爭取同多國電信商合作，推動5G部署。最近更推出全球第一部三摺手機，大膽到同美國蘋果打對台，喺同一日搞發布會，可見幾咁有自信。華為可以話係完美展現咗炎黃子孫愈挫愈強，自強不息嘅精神，你今日可以比我強，但我日後一定會比你更強！

呢種對比令人不禁反思，點解喺體育領域嘅國足，可以同華為有咁大嘅差距？國足喺賽場上表現不如理想，技術同戰術問題可以通過訓練改進，但如果精神態度唔掂，又點樣向上游？

華為今時今日嘅成功，就係最好嘅榜樣，面對困難同挑戰，應該以積極進取嘅態度去迎擊，我哋中國根本唔應該存在一隊咁樣嘅國家足球隊，要知道國足係國家形象嘅一部分，唯有拎出有如華為一般堅韌不屈的精神，先有資格真正代表中國，喺國際舞台上同人哋一決雌雄。

（文章純屬作者個人意見，不代表本報立場。）