近年北上消費已經成為大勢所趨，無他，深圳喺衣食住行各方面相比香港都平靚正，尤其係服務態度真係唔話得，加上現時關口多多，交通實在太方便。就算當年聲嘶力竭大叫「反送中」嘅小黃人，到了今時今日，都仲有唔少人抵唔住身體嘅誠實「自動送中」。最近，藝人盧覓雪喺Facebook分享自己周末北上Chill一Chill，睇完張學友演唱會後去食潮州菜，仲大讚九肚魚春卷話好鐘意添！

盧覓雪嘅分享引起唔少網民嘅興趣，紛紛留言詢問餐廳嘅資料，而盧覓雪亦非常熱心，逐一回覆餐廳地址。不過，亦有唔少人表示疑惑，質疑佢點解要北上消費，話佢冇骨氣，甚至反問盧覓雪對得住獄中嘅「手足」咩！喺呢度唔打算深究盧覓雪嘅政治取態，但到咗2024年仲刻意分藍黃，就猶如法國大餐咁食多舊魚，畢竟生活總要繼續，經濟嘅現實往往比政治立場更具影響力！

黃營嘅集中地「連登」討論區早就針對類似議題爭論過無數次，早前有人爆料指出，一啲自稱所謂「黃店」已經採用咗來自中國內地嘅外賣平台，甚至支持在囚「手足」嘅「候鳥」，亦被指幫襯中資速遞公司派送月餅，有支持者直指有畀人呃嘅感覺。不過，亦有唔少理智嘅人早已認清大勢所趨，認為既然無法完全與中國內地割裂，倒不如大方接受。

畢竟，講到底，經濟與生活係唔會因為意識形態而停滯不前。其實，唔少原本高舉黃色旗幟嘅「手足」，都慢慢發現，生活始終要繼續，口袋裡有錢先係硬道理。對於佢哋嚟講，邊度有得着數，邊度有得食好嘢，邊度就係佢哋嘅目的地。正所謂「身體誠實」，就算口口聲聲話要與中國劃清界線，最後仲係抵唔住平靚正嘅誘惑，結果一樣係「自動送中」。

所以，無論係黃營定藍營，面對北上消費呢個大趨勢，真係無謂再分咩顏色，因為當你跨過深圳河，發現一切都如此方便快捷嘅時候，你就會明白，所謂嘅政治立場，往往難以抗衡現實生活嘅需要同便利。而盧覓雪嘅例子，只不過係眾多香港人選擇北上消費嘅其中一個縮影，無論小黃人之前表現得有幾強硬都好，最後都係難逃一口「真香」。

原圖：盧覓雪Facebook

（文章純屬作者個人意見，不代表本報立場。）