喺奧運呢個最高嘅體育舞台上，運動員展示嘅唔單止係卓越嘅技術同堅韌嘅意志，仲有運動精神同風度。然而，令人遺憾嘅係，當有啲人帶住政治眼光嚟睇奧運時，呢個純粹嘅競技嘅舞台就變得充滿咗偏見同歧視。

喺日前嘅巴黎奧運女子重劍個人32強賽中，中國選手孫一文同日本選手吉村美穗打得勢均力敵，最終去到「決一劍」環節，即係一劍分勝負。裁判指吉村美穗刺中咗孫一文，但孫一文認為對手並未擊中自己，提出咗申訴，但最終裁判維持原判，孫一文以1分之差惜敗。即使咁樣喺比賽結束後，孫一文仍然展現咗體育精神，主動同對手握手，接受比賽結果。

令人費解嘅係，網上有部分人對孫一文嘅維護自己權益嘅行為批評，甚至因為佢嘅國籍而攻擊佢．相比之下，日本柔道選手永山龍樹喺柔道男子60公斤級嘅比賽中，因為對裁判嘅判決唔滿意，賽後拒絕同對手握手，仲一度唔肯落場，導致觀眾發出噓聲。咁樣嘅行為真係符合奧林匹克精神咩？有趣嘅係，喺黃營網軍集中營「連登」等論壇上，睇到同孫一文申訴事件截然不同嘅風向，討論熱度仲遠遠唔及批評孫一文嘅帖文。

如果呢種情況發生喺其他運動員尤其係中國運動員身上，又會點樣呢？運動員十年磨一劍，對成績緊張係理所當然嘅事，但我哋是否應該反思一下，點解類近嘅行為，不同嘅國籍會得到如此唔同嘅對待？我哋是否應該拋開政治偏見，用公平、公正嘅態度嚟睇待每一位運動員？點解有啲人對待不同國籍運動員時會出現咁明顯嘅雙重標準。對於永山龍樹嚟講，佢賽後不滿嘅情緒同爭議行為似乎因為佢嘅國籍被某啲媒體同觀眾選擇性忽略。呢啲是否說明咗當前某啲人睇待奧運嘅態度充滿咗偏見同政治因素？

運動員無論來自邊個國家，都應該喺賽場上公平競爭，展示自己嘅實力同風度。而觀眾同媒體，亦都應該以同樣嘅標準嚟評價佢哋。孫一文賽後嘅行為展示咗對運動精神嘅尊重，即使佢對比賽結果不滿，但佢依然有風度咁接受咗呢個事實。呢啲表現難道唔更值得我哋讚賞同學習咩？

奧運會嘅精神，相信大家都好清楚，如果我哋總係帶住有色眼鏡睇唔同國家嘅運動員，咁奧林匹克精神又點能夠真正體現呢？如果一位運動員嘅國籍能夠影響我哋對佢哋行為嘅判斷，咁我哋是否真係尊重咗體育精神呢？

（文章純屬作者個人意見，不代表本報立場。）