以哈戰事至今仍然停戰無望，主因是雙方各執一詞，未肯退讓。以色列軍方5月17日表示，16日晚喺加沙發現兩女一男人質嘅遺體，將帶回以色列。以色列總理內塔尼亞胡形容消息令人心碎，重申會帶回所有人質，「不論生死」。而哈馬斯就警告，永久停戰是讓剩餘人質活着回家的唯一方法。據報道，目前尚有129名人質仍受困加沙。

事實係，以哈戰事若然再持續下去，在加沙的人質就愈「凍過水」。之前哈馬斯先至發放人質片段，死者Nadav Popplewell ，擁英國國籍，51歲，喺個幾月前嘅以軍空襲中受重傷。哈馬斯指，由於以軍破壞加沙地帶多間醫院，該人質未能獲得適切治療，傷勢惡化致死。至於巴人，哈馬斯管理嘅加沙衛生部提供嘅數字顯示，由上年10月7日以哈衝突爆發，至到今年4月30日，加沙地帶總共錄得34622人死於以色列軍事行動，其中唔少係婦孺。

目前戰事仍然持續，以色列表示，將加派更多部隊進入加沙南部拉法。以色列無視國際反對，向拉法發動攻勢，南非16日要求位於荷蘭海牙國際法院下令以色列必須停止軍事入侵拉法，以確保巴人存活，要求以軍立即無條件全面撤出加沙，局勢愈嚟愈亂，矛盾愈嚟愈難解。

眾所皆知，內塔尼亞胡殺紅雙眼，點會理外界輿論要以軍停火？何況佢睇透美國講一套做一套！呢，美國眾議院通過法案，希望迫使拜登向以色列運送武器，16名民主黨人倒戈投贊成票。白宮早前話明，如果國會通過法案，拜登將會行使佢嘅總統否決權。

拜登政府為阻止以色列向加沙拉法發動攻勢，本月暫停運送一批包括有3500枚炸彈嘅武器。這引嚟共和黨批評，話拜登放棄美國喺中東嘅最親密盟友。右翼共和黨人認為，呢啲武器喺對抗哈馬斯嘅戰鬥入面可以發揮重要作用，總統無權指摘以色列使用美製武器。適逢今年係美國選舉年，出於政治算計，兩黨互相指摘在所難免。要言之，拜登未能煞停以哈戰事，國內大學生反以色列怒潮仍持續，拜登選情難免有阻滯。

加沙長期陷入嘅人道主義危機，以色列揚言要「殲滅所有哈馬斯」，仲增兵攻打拉法，巴人隨時再大規模遇害！美國一開始偏坦以色列，如今內塔尼亞胡政府已經變成一頭唔受控制嘅怪獸，佢睇透美國根本不著意以哈停火！唔係咩？據外媒17日報道，多個西方國家向以色列政府致聯署信，反對以色列全面攻擊拉法，敦促以色列喺加沙發動軍事行動時必須遵守國際法，包括國際人道法。聯署嘅國家包括南韓、荷蘭、丹麥等國，七大工業國（G7）成員國中，只有美國冇簽署。

美國連簽個名都吝嗇，內塔尼亞胡看在眼裡，豈會輕言退兵；而且華府一直認為，加沙冇發生種族滅絕呀嘛！係嘅，對冷血嘅美國嚟講，加沙仍在哭泣，有小孩嘅哭聲，點算種族滅絕？

原圖：President Joe Biden Facebook

https://www.facebook.com/photo?fbid=1048266183967011&set=pcb.1048266273967002

文章純屬作者個人意見，並不代表本報立場