日本首相岸田文雄早幾日國事訪問美國，受到美國總統拜登高規格接待，除咗喺高檔豪華餐廳用餐，更加整咗場國宴畀佢嘆。

根據美國第一夫人吉爾向傳媒介紹，國宴將有超過200名賓客出席。據報道，前菜係自家醃製三文魚，主菜是乾式熟成肋眼牛扒配胡椒黃油、蠶豆、蘑菇和洋葱，甜點係鹹焦糖開心果蛋糕，再配上抹茶奶油巧克力醬，以及櫻桃雪糕，老朽睇見都流晒口水。呢場國宴，美國花咗唔少心思，布置會場就係一例，除咗用咗吉爾最鍾意嘅玫瑰同牡丹鮮花，仲有進口櫻花，啱晒岸田文雄心水。咁都未算，晚宴嘅表演嘉賓唔惹小，由著名歌手Paul Simon演唱。白宮出嚟認叻，話叫Paul Simon嚟唱歌，係因為知道岸田文雄鍾意喎。可以睇到，老美極力討好日本，岸田自然更加「識做」。

呢，岸田文雄為咗喺美國國會參眾兩院聯席會議上發表英語演講，竟然嚟咗一場特訓，聘請一名曾為美國總統撰寫演講稿嘅寫手，為講稿錄音，令岸田可以聽返自己講過乜嚟不斷練習。報道仲話，呢次係日本首相第一次請美國總統嘅演講撰稿人幫拖。

點解要花咁大篇幅再講岸田文雄為咗老美做過乜？就係想做一個對比，因為岸田嘅努力並冇感動日本國民，反而惹來劣評，指佢有時間練習英語演講，倒不如多點關注民生！仲有唔少聲音批評，日本唔係美國嘅殖民地，而係獨立國家，演講應該用日語進行，恥笑佢自降國格，擺出一副奴才相！

岸田文雄奴顏婢膝

有論者指出，若選舉當今世界最冇骨氣嘅國家，日本認咗第二，其他國家唔敢認第一！講真，如果睇岸田文雄嘅行為，確實有一定道理。岸田作為一國首相，喺國會演講除咗用英文，內容更加係肉麻當有趣，講乜鬼「我從小就對美國有一種親切感」、「我們的關係從未如此緊密」。岸田文雄咁鬼此奴顏婢膝，難怪連佢嘅國民都唔buy，岸田文雄近排民望持續潛水，連續第六個月低過三成，屬於下台危險線！

岸田文雄嘅外交政策一面倒向美國，美國自然投桃報李，表示岸田呢次嘅行程向世界展示美日關係比以往更堅如磐石囉！岸田文雄同拜登嘅會談，雙方達成約70項包括太空、能源、新興科技、量子計算等領域合作。岸田今趟嘅國事訪問美國，雙方可謂如膠似漆！岸田也十分挖盡心思討好美國，佢送咗250棵櫻花樹苗予美國，預祝美國於2026年建國250周年，「願櫻花永遠盛開，象徵美日關係牢固」云云，老朽睇見都覺得肉麻。

日本嘅所作所為極度荒謬，其外交政策明明全情傾向美國，但又想搵中國著數。最近日本政府發表年度《外交藍皮書》，竟然厚顏無恥又吹噓中日關係，話中日兩國對地區以至世界嘅和平和繁榮均有巨大責任，日本推進同中國嘅戰略互惠關係，構建具建設性嘅穩定中日關係，要求中國喺懸而未決嘅難題上對話，喺共通嘅議題上合作，呢啲廢話日政棍講完自己都唔會信！更加搞笑嘅係，日本仲好意思叫中國立即撤銷因應福島核廢水排海實施嘅水產進口限制，自己排核污水，要迫中國人食，真係好嘢。日本好意思廢噏「中日戰略互惠」，根本就係語無倫次，人格分裂

事實上，日本極力巴結美國，拉大旗作虎皮，完全唔知何謂分寸。岸田文雄更加目光短淺，睇唔到當今美國已今非昔比，而中國國力不斷上升。你睇！美國喺全球影響力逐漸衰落，連一個以色列也管不住，搞到中東局勢緊張失控！日本一注獨押美國，相信會輸到四腳朝天！

原圖：首相官邸YouTube影片截圖

文章純屬作者個人意見，並不代表本報立場