特區政府日前就《維護國家安全條例草案》(23條草案)刊憲，草案提出各項罪行嘅最高刑罰，其中叛國、叛亂等罪行，一經定罪，最高可判處終身監禁。立法會《維護國家安全條例草案》委員會昨(3月9日)審議條文內容，自由黨立法會議員張宇人關注叛亂罪同叛國罪嘅分別。鄧炳強解釋指，叛亂罪不限於中國公民，而叛國罪僅限於中國公民。

前保安局局長兼新民黨立法會議員葉劉淑儀問及，2019年有暴徒破壞立法會，係咪屬於叛亂罪？保安局局長鄧炳強仲話，不論係有人衝入立法會，抑或有人喺街頭縱火，只要危害國家安全，但又未去到叛國嘅情況，都屬於叛亂罪。

至於叛國罪係咪適用於外國人，鄧炳強指「叛國」條文中針對的「中國公民」，其定義係根據《中華人民共和國國籍法》，凡具有中國血統嘅香港居民，出生在中國領土，包括香港，以及其他符合《中華人民共和國國籍法》規定嘅人，都係中國公民。至於一般喺香港住滿7年，無中國血統嘅香港居民，唔會「跌入」相關情況。

而喺「披露他人犯叛國罪的規定」中，列明基於法律專業保密權理由嘅申索、權利或享有權不受影響。律政司司長林定國就話，《基本法》下保障任何人有權諮詢律師，佢舉例指如果有人向律師諮詢組織軍隊推翻特區或中國會唔會犯法，成個諮詢過程內容需要保密，律師唔向外披露，唔會觸犯法例。不過如果有人向律師朋友透露即將叛亂，但唔係諮詢，嗰位律師如果唔披露就係犯法，不受法律專業保密權保障。

不論叛國罪定係叛亂罪，都屬於嚴重罪行，只要有人違法就必須嚴懲，期望《基本法》第23條盡快立法，堵塞國安漏洞！

原圖：星島日報圖片

https://image.stheadline.com/f/680p0/0x0/100/none/edf3c9f1791fd0dc701e2e86b9f74257/stheadline/news_res/2021/09/23/725570/i_src_702326433.jpg