新的一年如果祈求世界和平，肯定係痴心妄想，講真，仲難過中六合彩頭獎！各位，依家俄烏戰事持續，中東戰火升溫！單係呢兩劑，牽涉太廣，世界局勢肯定動盪不安。打開報紙國際新聞，都係一個字：亂！

呢！位於南美洲西北部嘅厄瓜多爾局勢繼續混亂，總統諾沃亞10號形容國家正處於戰爭狀態，所有犯罪團體都係軍事目標。當局至今拘捕329名犯罪分子。與此同時，全國暴力活動持續，增至最少12人死亡，4人重傷，仲有9名警察被綁架！可以話全國亂到無法無天！而位於太平洋西南部嘅巴布亞新畿內亞10日因警察等公務員不滿減薪發動罷工，首都莫爾茲比港更爆發騷亂，民眾搶掠商店及縱火，混亂局面持續擴大至第二大城市萊城和戈羅卡等地，至少釀成16人死亡，其總理已宣布全國進入緊急狀態14天。中國駐巴布亞新畿內亞大使館表示，莫爾茲比港多家由華裔商人開設嘅店舖遭破壞搶掠，中國外交部已向當地提出嚴正交涉。

令人失望嘅係美卿多次到中東斡旋，祈以巴停火，可惜總是徒勞無功！甚至戰火外溢，以色列與黎巴嫩真主黨係邊境嘅緊張局勢持續升級。美媒早前曾報道，哈馬斯疑使用朝鮮武器，並刋登印有韓文嘅火箭零件圖片；以色列國防軍日前公布，指喺加沙發現100米長嘅哈馬斯兵工廠地道，並稱找到哈馬斯喺伊朗提供技術之下，開發精準制導導彈嘅證據。以巴戰火外溢，一牽涉伊朗，形勢頓然變得複雜。真主黨副領袖卡西姆不久前發表電視講話，表示真主黨唔想戰事超出黎巴嫩境內，之但係若然以色列擴大戰事，會無可避免地以震懾以色列所需嘅最大程度回應。

呢，真主黨話口未完，9日即用多架配備炸藥無人機突襲距黎巴嫩南部邊境約14公里嘅以色列北方司令部，呢次係真主黨在逾3個月以哈戰事中首次攻擊該設於以色列北部嘅軍事基地。這次襲擊，真主黨指係為報復以軍喺2日用無人機轟炸哈馬斯位於黎巴嫩貝魯特嘅辦公室炸死哈馬斯政治局副主席阿魯里，以及8日喺黎巴嫩近以色列邊境空襲炸死真主黨高級指揮官塔維勒。以色列國防部長加蘭特批評伊朗係整個西亞地區發展軍力，形容以色列正與一個軸心國作戰，佢預計加沙下一階段嘅戰爭將持續很長時間。美國總統拜登冇力叫停以巴戰事彰彰明甚。

至於俄烏戰事，烏克蘭總統澤連斯基無視形勢已不在他那一邊，亦昧著俄羅斯愈打愈強嘅客觀事實。俄羅斯近日加強空襲烏克蘭之際，英媒日前引述消息報道，伊朗不但為俄羅斯研發一款新型攻擊無人機，更快將首次向對方提供地對地彈道導彈補充戰力；與此同時，南韓政府稱北韓可能向俄羅斯出口其新型近程彈導彈，並且已經對烏克蘭使用。然而，澤連斯基依然口硬，一味打嘴炮，戀棧權位，無視烏克蘭生靈塗炭，不肯止戰談和，你話這個世界點會變得「明天會更好」？

香港雖然表面平靜，政府係逾千億財赤下，依然大力鼓吹「日夜都繽紛」，之不過股樓皆不振，民生多艱、不少人移民卻係事實，筆者唔少教師朋友亦紛紛移民，近排都唔記得食過幾多餐「離別飯」。「知己一聲拜拜遠離這都市」，筆者內心只有傷感，暫時未能感受到「日夜都繽紛」！

文章純屬作者個人意見，並不代表本報立場

原圖：無綫新聞截圖