2024年可謂係全球選舉大年。據不完全統計，2024年全球將有76個國家/地區舉行大選。北美、歐洲、俄羅斯、南亞等地區多個國家都將經歷重要嘅政治選舉。新一屆台灣地區領導人大選將於2024年1月13日舉行，時間僅尚餘11日。《美麗島電子報》公布最新民調：「賴蕭配」（賴清德和蕭美琴）嘅支持度升至百分之四十；國民黨「侯趙配」（候友宜和趙少康）跌至百分之二十八點九；民眾黨「柯吳配」（柯文哲和吳欣盈）只有百分之十七點六，敬陪末座。看來，如無意外，「賴蕭配」勝算較高！是否如此，好快揭盅，大家拭目以待。

至於其餘較重要嘅選舉，如俄羅斯、印度、美國。當以美國大選至為矚目，因俄、印兩國總統應冇懸念，俄羅斯嘅普京、印度嘅莫迪篤定連任。反而美國總統大選則充滿變數！美國2024年總統大選分3個階段：黨內初選（上半年）、黨內總統候選人確定（7 －8月）、兩黨候選人競選（8月－11月大選前）。

事實上，從最初一直都以為2024年嘅美國大選仍然係拜登與特朗普之爭。不過，拜登年紀老到不行了，記憶又差，經常噏錯嘢！當然，最致命係執政無能，美國捲入俄烏戰事、以巴大戰，均令佢備受國內外輿論抨擊！

政治一天也嫌長，拜登和特朗普都遇到棘手問題。拜登早前被國會眾議院表決通過啟動對佢嘅彈劾調查；所持理據矛頭直指拜登涉及其子亨特嘅海外商業交易。

正常推測，彈劾拜登獲通過乃不可能發生之事，皆因成功彈劾嘅門檻係至少三分之二參議員同意被告有罪，屆時總統才會被革職，改由副總統接替。之不過，目前參議院由拜登所屬民主黨控制；佔據剛好過半嘅51個席位，共和黨議席只有49個，更何況參議院議長由副總統賀錦麗兼任，佢有權「一票破局」。

拜登即使避過下台一劫，不過於角逐連任工程未免「聲譽」受挫，這難免予特朗普檢盡便宜。然而，特朗普係民調佔先之下，忽然殺出「攔路虎」。事緣美國科羅拉多州最高法院19日以4票對3票裁定，前總統特朗普煽動及參與2021年1月6日國會山莊暴動，根據憲法第14修正案第3條嘅判亂條款，佢無資格參加該州明年3月5日嘅總統選舉初選。科羅拉多州向來傾向支持民主黨，就算特朗普可參選亦勝算不高，且該州只有9張選舉人票。科羅垃多州嘅裁決唔會影響特朗普係其他州份嘅參選資格，而特朗普陣營將向聯邦最高法院上訴。

有美媒曾分析，指科羅拉多州最高法院嘅歷史性裁決可能影響其他州份，如果其他州最高法院作出類似裁決，特朗普將很難獲得共和黨總統候選人提名。日前，密歇根州最高法院又裁定特朗普可在州內参與明年總統選舉黨內初選。最新民調顯示特朗普支持率暫領先拜登兩個百分點。之不過，距離大選仍未入大直路，誰勝誰負睇怕仍有唔少變數。

照客觀形勢分析，特朗普支持度應勝拜登！

之不過，如今卻殺出個程咬金——那就是去年10月宣布以獨立候選人身份參選嘅小羅拔．甘廼迪，佢係前美國司法部長、參議員羅拔．甘廼迪嘅兒子，亦即係已故前總統約翰．甘廼迪嘅姪兒，因佢敢講真話，如建議全面封鎖美國與墨西哥嘅邊境，杜絕非法移民及其帶來毒品和暴力罪行等，因而備受選民注意。有調查指小羅拔．甘廼迪竟得到24%高支持度，對獨立候選人係少見嘅。當然，這與其家族聲望有關，更多係反映美國民眾對「老人政治」感到厭倦，而且，兩位老人家聲譽均有虧！看來，正如前總統奧巴馬話齋：美國係時候要change 改變吓喇！

文章純屬作者個人意見，並不代表本報立場

原圖： kennedy24.com截圖