以色列與哈馬斯停火後戰火重燃！休戰後以軍全面進攻加沙，誓剿滅哈馬斯，相信對加沙以至西岸佔領區巴勒斯坦民眾嘅攻擊及屠殺更為兇狠。以色列軍方表示，針對哈馬斯嘅地面行動，正擴大至整個加沙地帶。以軍要求南部約20個地區或街區嘅民眾再往南撒。然而，正如有聯合國官員及加沙居民表示，因為網絡不完善及電力供應不穩，有關命令難以及時遵守。據報道，有原本住喺加沙北部嘅居民表示，佢已經三度向南撤，如果撤往拉法之後又再被迫撤離，勢將撤無可撤！

有論者指出，巴勒斯坦人民在猶太復國主義者眼中，只係「人形動物」，老少都可隨意殺戮。同時，以色列極右政權早已殺得性起，以色列總理內塔利亞胡一早已表示不會停戰，佢一心只想吞併加沙，並把巴人趕盡殺絕，其理由亦堂而皇之：係為了國家永續安全。之但係，明眼人都睇得出，若然今次以色列打敗仗，其政治生涯恐怕即時玩完；為咗延續權力，加上美國為戰事拱火，內塔尼亞胡有足夠理由殺下去！

天地不仁，以萬物為芻狗。聯合國人道事務協調廳發言人形容，加沙再度成為人間煉獄。英國有媒體曾稱，以軍因相信來自數百被捕武裝分子嘅情報，有助佢哋殺死哈馬斯領袖。是以停戰後戰火重燃，以軍那管是否醫院、難民營、學校，只要認為有哈馬斯武裝分子藏身其間，一於照樣轟炸！

加沙政府的最新數據顯示，自今輪以巴衝突以來，加沙地帶有多達1.55萬巴人死於以軍襲擊，受傷人數超過4萬，當中高達七成死傷者是婦孺。有批評質疑，新政策無助減低軍事行動嘅大量平民傷亡。有聯合國官員直言，喺加沙嘅成人和兒童，都再冇安全嘅藏身地點，生存物資又唔夠。甚至有報道指，連衛生問題都劇惡化，衍生疾病而死亡將比以軍濫殺尤甚！

據美媒報道，這輪以巴衝突，美國至今已經向以色列提供嘅軍備激增，包括5.7萬枚155毫米炮彈，同埋1.5萬枚炸彈，後者之中包含人稱「碉堡剋星」嘅2000磅重BLU109炸彈。以軍火力強大，又有如此穿透破壞力強勁嘅炸彈，會放着不用嗎？

內塔尼亞胡已經發布擴大係加沙地帶軍事行動嘅指示，直至哈馬斯結束對以色列嘅威脅，並強調如果唔繼續喺加沙展開地面行動，就無法實現呢個目標。若然法國總統馬克龍嘅警告靈驗，即以色列想徹底摧毀哈馬斯，戰爭將持續10年！10年？筆者相信加沙已淪「千里無雞鳴，路有凍死骨」嘅死城！

呢，內塔尼亞胡揚言取得「全面勝利」後，同時拒絕讓巴人自治政府重掌加沙地帶，佢大言炎炎不會重蹈覆轍再次犯下嚴重錯誤。美國拜登總統認為加沙地帶戰後管治應交予巴勒斯坦自治政府，惟內塔尼亞胡一直唱反調，未肯聽拜登支笛，消息指佢計劃於加沙地帶境內設立安全緩衝區，實際係想控制整個加沙地帶，巴人被趕盡殺絕的意圖已經寫在牆上！

原圖：無綫新聞截圖

文章純屬作者個人意見，並不代表本報立場