美國總統明年大選，一般認為特朗普將再度與現任總統拜登交鋒。然而，拜登選情，近排被睇淡，除咗佢嘅健康問題惹疑，事關今個月上旬佢與越共總書記阮富仲會談後召開記者會，喺記者會佢一度答非所問，記者會遭腰斬，其健康又惹來「是否能應付總統工作」的詰問。除咗健康問題，近來令拜登深感困擾嘅，應係佢嘅仔亨特再度捲入官非，面臨涉違法擁槍3宗刑事檢控。

當然，仲有揮之不去嘅年齡問題，以80高齡仲競選連任？美國有線新聞網絡（CNN)嘅最近民調顯示，只有三分之一受訪民主黨人，傾向由拜登代表該黨角逐總統；《華盛頓郵報》有專欄作家甚至公開呼籲佢「讓位予他人出選」。拜登卻一幅「老驥伏櫪，志在千里」嘅雄心，佢不久前係紐約出席籌款活動時罕有回應，指佢比任何人都清楚大眾對其年齡嘅關注，之所以決定爭取連任，主要係因為特朗普與共和黨令美國民主岌岌可危，而佢嘅豐富閱歷亦有助於處理俄烏戰事和新冠疫情等重大危機。哦！當真？

誰做總統都頭大

其實，當今美國最大鑊就係經濟問題！據美國財政部數據，美國國債總額已首次突破33萬億美元，過去40年債務膨脹逾20倍，遠遠高於同期美國嘅國內生產總值（GDP）增幅。呢，至於公眾持有嘅債務亦已超過26萬億美元，粗略估計每位美國公民背負約9.7萬美元嘅債務。到2053年，美國國家債務佔GDP將由2022年財政年度約97%增至181%，國債利息支付額飆至5.4萬億美元。阿哥，堂堂世界經濟第一大國，淪落至世界第一「債仔」，你話悲唔悲？也就難怪這些年兩家國際信貸評級機構，先後下調美國嘅最高級別主權信貸評級，豈是偶然？

拜登政府面對另一個問題，就係治安大壞，撇開槍擊案件幾乎無日無之，依筆者看，就係盜賊如毛，搞到啲零售商都冇啖好食！上市公司發盈警常有，之不過美國嘅Walmart、Target等零售商也相繼對今年嘅盈利狀況發出警告，佢哋唔係冇生意，而係歸咎於一個特殊原因：就係盜竊大增！大家從唔少新聞或視頻，都可以見到啲人，連群結隊，浩浩蕩蕩，將啲店舖入面嘅貨物全部抬離「搬走」，動作快速俐落，如此將店舖貨物洗劫一空，成為美國一道亮麗風景線！據美國零售業聯會（NRF）估計，該行業今年將因盜竊及相關罪行損失近1000億美元，較2017年嘅468億美元急增逾倍！學者分析，背後原因複雜，如通脹、貧富懸殊、道德衰微、破窗效應等等。總之，美國治安崩壞是不爭事實！

拜登治下，美國搞成咁鬼樣，仲講乜「豐富閱歷」有助處理「重大危機」，不是牛頭唔搭馬嘴，既搞笑又廢到唔廢？事實係邊個做美國總統，唯一肯定必定頭都大！

原圖：Joe Biden Facebook

https://www.facebook.com/photo.php?fbid=341957955075372&set=pb.100077835098866.-2207520000

文章純屬作者個人意見，並不代表本報立場