剛過去嘅二十國集團峰會（G20），美國總統拜登忙於巴結印度總理莫迪。莫迪視峰會為難得嘅外交良機，盼藉此提升印度係國際事務上嘅地位，亦人之常情。莫迪早已投書國內報章，預告佢對G20議程嘅願景，佢係文章話：會透過諮詢不止G20的夥伴，還有聲音往往未獲聽見的全球南方同路人，來形塑G20的優先事項。

美國亦「識做」，力主聯合國安理會進行改革，讓印度成為常任理事國。山姆大叔又點會畀「免費午餐」印度食吖，咁好死，無非係因成事嘅話，今天嘅拉攏與硬銷工作，將來就變成係常任理事國中，多一枚棋子抗華、抗俄！

印度卯足全力嘅外交騷，宣傳全球南方概念，好明顯又係衝着中國而來，要爭奪太平洋島國和非洲盟友。呢，莫迪熱炒「全球南方」概念，加上美國嘅煽動，明顯想同中國爭一日之長短。拜登極力討好莫迪，支持印度拉攏「南方國家」，全力抗衡中國嘅「一帶一路」。莫迪投桃報李，情傾老美，為印太戰略鼓與吹，固亦有跡象可尋。

印度吃了豹子膽惹中國？

美媒近日報道，美國係不同嘅國際論壇埸合，直問印度若台海衝突，印度將發揮乜作用？據悉，印度國防參謀長拋出兩個方案：其一係印度喺台海戰爭中對盟國提供軍艦、戰機嘅維修保養、提供食物、燃料和醫療設備等；其二係台海衝突爆發，印度就在中印喜馬拉雅山有領土爭議嘅地方，向中國發起軍事進攻！阿哥，如此直接向中國宣戰？明顯吹水唔抹嘴！情傾美國，都唔係咁冇底線啩？今時今日嘅中國，連美國都惹不起，印度吃了豹子膽？打了雞血？反正筆者就不信了！

呢，越南近排亦得美國拉攏，越南和美國2013年建立「全面合作夥伴」關係，如今剛踏入10周年之際即「跳級」到最高層級嘅「全面戰略合作夥伴」，老美對越南不是青眼有加是甚麼？拜登係結束G20峰會即從印度新德里飛抵越南，雙方簽訂一項協議，讓美國和中國、俄羅斯、印度和南韓一樣，喺越南外交關係上同一等級。

此外，美越加強半導體稀土合作，拜登強調要「建立更具韌性嘅半導體供應鏈」，可見中國禁止晶片製造關鍵原料稀土出口，確實對美國半導體供應鏈有一定程度嘅影響。老美睇中越南稀土產量年增10倍，已成全球第六大生產國，同越南加強合作，大大有助美國減少對中國稀土嘅依賴。

越南嘅外交倒是靈活多變，美越關係縱使「跳級」，並不代表越南會放棄中國和俄羅斯等舊有合作對象，越南幫襯俄羅斯購買武器，美國亦知道。老美不但冇加以制裁，且要「跳級」加強合作關係，越南外交確有兩手。不久前，中聯部長劉建超才訪越，會見越共中央總書紀阮富仲及越南高官，而越南政府可能會於短期內再派高層級官員訪華。可見越南係「識時務者為俊傑」，外交八面玲瓏，不至如印度一面倒向老美！

原圖：President Joe Biden Facebook

https://www.facebook.com/photo.php?fbid=868419321951699&set=pb.100063509179160.-2207520000&type=3

文章純屬作者個人意見，並不代表本報立場