日本防衛省確認2024年度開支預算，達到破紀錄嘅7.7385萬億日圓，即約4172.77億港元。這比2023年度創新高嘅6.82萬億日圓軍費，高出近一萬億日圓或12%。主要為實施政府去年12月就全年提升國防力量所決議嘅3份國安保障戰略文件，商定未來5年總額43萬億日圓嘅國防開支。

日本嘅軍事安全動向一直備受亞洲鄰國和國際社會關注。眾所周知，日本一直在自我轉型。自去年12月更新「安保三文件」，即《國家安保戰略》、《國家防衛戰略》和《防衛能力整備計劃》，可見其野心不斷拓大，尤其形容中國為日本前所未見嘅「最大戰略挑戰」，並賦予自衛隊攻擊敵方和領土導彈據點嘅「反擊能力」。這種大幅度改變戰後「專守防衛」政策，還不是軍國主義死灰復燃？

日本防衛再破頂，包括設立「統合司令部」，以及由海陸空自衛隊共同組成嘅「海上輸送群」，購置機動船艇與運輸直升機等登陸裝備，以強化西南諸島嘅運輸力，並有意加強攔截導彈嘅能力，譬如打造配備神盾系統嘅軍艦（ASEV）和開發對高超音速導彈嘅新型導彈等。防衛省同時會斥資3301億日圓購買17架部署於離島及運輸物資嘅大型運輸直升機，以及耗資2333億日圓採購合共15架F35A和F35B隱形戰機。此外，撥款開發較12式反艦導彈射程更長、精度更高嘅地對艦及地對地導彈；還有撥款與英國及意大利聯合開發新一代戰機等。

日本之所以有咁多搞作，當然並非全為「自衛」。學者指日本積極動作嘅背後，主因係對台海局勢嘅關切，擔心兩岸若統一，會成為其「戰略災難」；東京都不願看到跟自己有領土爭議和歷史敵意嘅共產主義中國來到家門口！此所以日本近年更傾斜倒向山姆大叔懷抱。日媒日前刊登日本自衛隊統合幕僚長吉田圭秀嘅專訪，佢話：喺不斷變化嘅地區和全球挑戰下，自衛隊現時無法自衛，必須加強防衛能力！

吉田圭秀又表示，俄軍侵烏給日本嘅啟示，係日本要盡所能維持「延伸威懾」。阿哥，吉田講到日本周邊好似有虎狼環伺，隨時會吞咗日本呢隻小雞咁款！跟住就表態，由於自衛隊現有嘅能力，未能維持日本安全，因此政府才需要將防衛開支增至國內生產總值（GDP）嘅2%，並從根本上加強「安保三文件」。

吉田真係好戲！要擴軍都可以拉扯大堆歪理，並稱民調顯示很多人支持增加防衛開支以及日本獲得反擊能力。其實日本人反戰者多，日本自二次大戰末期，即1945年8月6日與8月9日，遭老美於廣島市、長崎市各投下一枚原子彈，造成數十萬日本平民死亡。民眾記憶猶深，根本就反戰居多，並不希望日本再走上軍國主義之路！如今吉田所言，未免自欺欺人！

原圖：PM's Office of Japan X圖片

https://twitter.com/JPN_PMO/status/1689141957917093888?s=20

文章純屬作者個人意見，並不代表本報立場