日本不顧中國、韓國及鄰國反對及抗議，一意孤行最快下月開始排放福島第一核電站嘅核廢水，本港專家質疑日方相關報告所用嘅數學模型簡陋，引起不確定性；亦有日式食肆指，刺身生意已下跌一至兩成。

呢個好明顯係心理影響，或對日本水產安全嘅擔憂，甚至抗拒。內地重申禁止進口福島等10個都縣嘅食品，並對其他日本食品，尤其水產，當嚴格稽核其食物安全證明。早前有議員表示，香港應參考內地做法，禁止相關日本食品進口，表態反對排放。要食得安心，筆者絕對贊成！事實上，本港係日本海產食品嘅最大入口地區，港府的表態，多多少少也會給予日本政府一點啟示。日方嘅做法，必引來水產等滯銷。

呢！國際原子能機構（IAEA）總幹事格羅西不久前與韓國最大在野黨共同民主黨嘅議員代表會晤時，為日本福島第一核電站核污水排海計劃安撫對方，之不過，該黨批評IAEA從開始就冇遵循中立和客觀原則，做咗偏袒日本嘅驗證工作，真係一語中的！以絕食抗議核污水排海嘅議員禹元植指斥，IAEA還未有核污水排海對周邊國家影響嘅調查就下達結論，係「自行其是的檢定，遷就日本的調查」！佢反問：福島核污水若然真係咁安全，喺缺乏淡水嘅日本，何必要排放核污水？直接拿來作食水，或作農業、工業用水，不就可以了嗎？

不去日本 大把地方可選

呢單嘢備受國際關注不難理解。阿哥，累積逾130萬噸嘅核污水，要排長達30年，如果話對海洋生物唔會造成影響，對食物安全冇威脅，如果對呢啲核污水經處理後咁有信心，日本何不直接拿來做食水？即使唔作食水，日本要排放，都應該將佢排放喺自己國土上，而唔係排放公海而引來咁多爭拗和抗議，包括日本人民！

事實上，正如中國外交部批評，報告未能充反映所有參加評估工作各方專家嘅意見，有關結論未能獲得各方專家一致認可，中方對機構倉促出台報告表示遺憾。30年排放以上百萬噸計核污水，外交部批評係將太平洋當作下水道，中方再次敦促日方停止核污水排海計劃，如果日方一意孤行，必須承擔一切後果。

看來，日本排核污水已成定局，一來有IAEA為佢全力護航，二來有美國一大早為其縱容撐腰，喺咁嘅「有利」環境下，試問日本又怎會忽然「回頭是岸」呢？

世界已經這麼亂，日本卻仍唯恐天下不亂，製造核污水長遠「食不安心」問題。筆者自求多福，已經開始抵制日本食品，暫不考慮到日本旅行。何況世界食材那麼多，大把嘢可以替代。世界之大，不去日本，大把地方可供選擇！

原圖：新華社

文章純屬作者個人意見，並不代表本報立場