印度總理莫迪早前國事訪問美國，受到美國總統拜登高規格接待，知道佢係素食者，又為佢炮製米芝連素食，莫迪飄飄然必矣！據悉莫迪喺美國國會演講時，盡講美國佬愛聽嘅話，甚麼民主自由、共同價值啦！逗得那班議員政客心花怒放，有人算過，莫迪嘅演講贏得國會議員15次起立以及79次掌聲，威過天皇巨星，認真誇張！

莫迪又與拜登係白宫進行兩個半小時閉門門會談，會後發表聯合聲明，拜登強調「美印兩國是全球最親密的夥伴之一」，繼南韓之後，印度可以說是美國另一積極拉攏嘅國家。聯合聲明特別提到，東海及南海緊張局勢加劇，之不過，維持國際法及航海自由嘅重要，決心抵制任何單方面顛覆多邊體系嘅企圖。

阿哥，畫公仔唔使畫出腸，呢番說話又係針對中國。印度靠攏美國，意味部署印太嘅美國海軍艦隻，日後可停靠印度港口維修等便利；此外，印美關係既然係「全球最親密」，意味印度今後必漸疏遠俄羅斯，而今後中俄關係又必靠近一步，以抗美印圍堵！不過，明眼人都睇到，印中關係既有競爭也有合作，印度不可能全面傾向美國。

此外，印度嘅實力，同中國仍有一段距離，講真，印度若一面傾倒向美國，實在百害而無一利。眾所皆知，印俄向來過從甚密；俄烏之戰，俄羅斯備受美國制裁，然而，印度一樣大手購入俄羅斯廉價石油，更何況印度向來都係俄式武器大買家。如今被山姆大叔大灌迷湯，印俄關係會否疏遠？加上如今俄羅斯總統普京受到「兵變」，權力受到挑戰，印度會藉此疏遠俄羅斯嗎？相信只要觀察一會兒，始終紙包唔住火，好快就知！

美國要拉攏印度，甜言蜜語說盡，拜登又來一招「吹水唔抹嘴」，義憤填膺咁話，全球治理必須具包容性和代表性，美國支持印度為改革後嘅聯合國安理會常任理事國。阿哥，你估真係手瓜起腱，食嘢唔洗畀錢？都乜嘢年代，仲講埋啲呃無知少女嘅鬼話！

喂！依家有5個常任理事國，即美國、中國、法國、英國和俄羅斯。印度有可能成為第6個常任理事國嗎？正如有論者道破，根本冇可能，皆因首先要經過複雜嘅改革程序，而入常申請需要一致通過，5個常任理事國都手握一票決否權，只要一國反對就拉倒，想想即使美、法、英都贊成，中國和俄羅斯會認同嗎？美國所謂「支持」印度成為安理國常任理事國，不是呃鬼食豆腐嗎？

都話不誠無物，印度總理莫迪唔係如此低智，連咁信口開河嘅廢噏都信啩？莫迪若仲有一分清醒，當要堅持獨立自主嘅外交原則，若然輕易淪為美國嘅政治附庸，咁就真係陸雲延睇相，唔衰攞嚟衰咯！

原圖：拜登Twitter圖片

文章純屬作者個人意見，並不代表本報立場。