美國總統明年嘅競選，原初都以為係前總統特朗普對爭取連任嘅現任總統拜登之爭。

然而，政治一日都嫌長，依筆者看，很大機會出現變數，尤其面臨私藏機密文件案再遭刑事起訴嘅特朗普，競選之路陰霾滿布，障礙重重。

美國司法部9日公開特朗普嘅起訴書內容，佢被控37項控罪，包括未經授權保留機密文件及密謀妨礙司法公正，佢係美國歷來第一位被聯邦刑事起訴嘅前總統。儘管特朗普指有關檢控係「政治迫害」，佢全部唔會認罪，並係司法部公開控罪書內容後，在其社交網發文，批評檢控官史密斯精神錯亂和仇恨佢，不應參與任何涉及公義嘅案件。

點講都好，今趟嘅起訴，無疑令特朗普「捲土重來」再當總統嘅機率大打折扣！佢涉嫌不當處理機密文件案，面臨嘅控罪，像妨礙司法公正，罪成最高可判囚20年；未經授權保留國家安全文件，罪成最高判囚10年。此外，特朗普除咗私藏密件案外，仲有其他官司纏身，當真忙得不可開交！

今趟，筆者估特朗普冇咁易甩身，種種跡象顯示，聯邦法院起訴佢，事前必定掌握到唔少「堅料」。近日有報道爆料稱，檢方取得一段特朗普嘅錄音，當中佢承認離開白宮後，保留一份國防部機密文件，特朗普嘅競選及法律團隊均未有回應。

呢單案顯然十分棘手，特朗普因此案遭控告後，其兩名律師於9日宣布離職，不再參與此案工作；同日特朗普透露，其一名前助手亦因此案被起訴。呢位前助手瑙塔離開白宮後，便轉赴特朗普被發現私藏密件嘅海湖莊園擔任私人助理。據悉，瑙塔被指與特朗普串謀，保管從白宮帶走嘅機密文件，避免聯邦大陪審團發現。FBI去年8月搜查特氏位於佛羅里達州嘅私人別墅海湖山莊，帶走約1.1萬分文件。看來，特朗普今趟水洗唔清！佢「堅持唔認罪」亦唔等於佢「身家清白」而無罪！

至於現年80歲嘅拜登今個月一號又係人前仆倒。從影片可見，佢係科羅拉多州美國空軍學院嘅畢業禮上，向最後一名學員頒授文憑後走回座位時，突然係台上跌倒，在場3人立即走近將佢扶起，拜登隨後伸手指一指地上嘅沙包，似乎在說被佢絆倒，幸好跌倒後無恙，可以自己行去座位。呢次拜登跌倒，又惹起民眾對佢健康嘅質疑，美國第32任總統小羅斯福有名言：「制約我們認識明天的唯一因素是我們對今天的懷疑。」拜登早前已宣布要競選連任，如果佢成功連任，到任期完結時已經係86歲。民調亦顯示拜登不應再次競選，主要都係認為佢太老喇：一個80歲的老人，治理世界第一軍事強國，所要兼顧嘅事情太多了！年紀大不能不說係一個障礙。

選美國總統，曾被戲稱為「選熟識的魔鬼」，今兩個美國人民熟識嘅魔鬼，雖然仍然熱衷於做魔鬼，戀棧權力，可惜「時不我與」，如果稍有自知之明，好應該退下來，縱然不能讓美國「再次強大」，起碼不會讓「美國精神」變太多酸宿腐朽之氣！

文章純屬作者個人意見，並不代表本報立場

原圖：Donald J. Trump Facebook