有人指出，中國文化講究「有事必有道」。有大道，有小道，有正道，有邪道，有得道，有失道。要言之，人事的活動，必有少數的領導和多數的追隨，總之要有一個合乎羣眾心願和想望的口號。唐朝詩人白居易說「去者逍遙來者死，乃知禍福非天為」，政客浮沉名利權勢，若加上胡作非為，通常冇乜好下埸！

呢！不久前，「比生菜還短命」嘅前英國首相卓慧思忽然訪台，更發表演說。卓慧思明明不在其位，竟到訪敏感地台灣，係想藉此刺激北京？喂，究竟佢係咪食塞米？英國商業及貿易部國務大臣莊敦文日前先訪港，與財庫局局長許正宇見面，雙方進一步討論移除市場壁壘，以增加兩地貿易等議題。可見英國急欲修補關係，依家呢個婆娘卻走來廢噏無謂，會否激怒中國？同時會否令莊敦文見財化水，分分鐘令「日已落國」傾唔成生意，就真係蕃薯跌落灶頭，該煨咯！

再講啊！若然非現任首相辛偉誠派佢訪台，佢自己不耐寂寞要去見蔡英文，咁就不但缺智慧，更加患咗大忌！分析者指出，當記者嘅鎂光燈落於卓慧思身上，意味着辛偉誠政府已被喧賓奪主，外界點睇卓婦人嘅演講？相信其言代表英國西敏宮？還是落魄政客隨口噏，當秘笈？喂！若講台海問題又踩紅線，分分鐘變烏鴉口大累街坊！講真，即使係台灣政府邀請佢去，剛下台不久嘅卓婦人，呢的邀請可免則免啦！

此外，英國又證實給予烏克蘭提供射程超逾250公里嘅「暴風影」巡航導彈，係首次有西方國家向烏國提供長程導彈，有軍事專家形容係真正可改變戰場格局嘅武器，對駐守克里米亞半島嘅俄羅斯軍艦構成一定威脅！

政客睇來都唔想世界和平，俄烏持續膠着，中國欲「勸和促談」，西方國家並不熱衷支持，好像中方若真正調停成功，美國及北約成員國就冇唒面，更會坐大中國嘅外交實力和國際地位！講真，俄羅斯總統普京怎會認低威，依照澤連斯基開列嘅條件談和吖！發夢冇咁早！切勿忘記俄國係核強國，烏克蘭靠美國、英、德等嘅大力軍援，縱使迫退俄軍，甚至令俄羅斯「走投無路」，大家相信普京會「坐以待斃」？真不會動用大殺傷力武器？以普京可以被毀滅不能被打敗嘅硬漢性格，筆者唔信囉！

原圖：卓慧思Twitter、素材網

https://twitter.com/trussliz 

文章純屬作者個人意見，並不代表本報立場。