英國支持烏克蘭戰爭，其力度同山姆大叔有得揮。有論者甚至指出，無論前首相約翰遜、「短命首相」卓慧思，或現任首相辛偉誠，都一直推動國際行動去支持烏克蘭，目標係使烏方能戰勝俄羅斯和達到持久和平。

呢嗱！去年2月俄烏衝突以來，英國已單方面向烏克蘭提供多種武器。包括反坦克導彈、大炮、專用彈藥、長程火箭發射系統、防空武器系統和裝甲車；今年1月，英國係全球首個國家向烏克蘭提供主戰坦克。

喺英格蘭，烏克蘭國旗隨處飄揚。民眾估計共捐出4億英鎊，而且收容超逾25萬烏克蘭難民，仲有民調指英國民眾普遍冇將生活成本上升問題歸咎於俄烏戰事。可以見到英國支持烏克蘭，絕對出於真心誠意。有分析指，呢個係價值觀，英國介入俄烏戰事有「道德聖戰」嘅意義，亦成為跨政黨共識。

筆者覺得呢個係一個誤判和誤解，一如有學者指英國堅持讓烏克蘭戰勝和將俄烏邊界推回2014年前，呢種戰略目標容易變得不切實際，甚至岌岌可危。因為如果處理不宜，分分鐘傷害英國政府喺國內嘅合法性及國際聲譽。

筆者忽然想起中國駐美國前大使崔天凱早前向內地傳媒表示，美國嘅對華政策經過很大調整，美方對中國發展嘅誤解和誤判造成對中國看法有變化，估計美國對華政策嘅消極變化仍會延續數年。

崔天凱2013年開始到美國工作，至2021年回國，佢喺美國8年，對美國相信有一定認識，佢指出美國對中國嘅「誤判」可以影響對中國外交嘅變化，這或許是指美國常把中國和平崛起說成是「中國威脅論」。

美國的統治階層有霸權心態，認為只要中國發展了，不管有沒有爭霸的意圖，對美國來說就是威脅，影響其世界霸權地位。也就是這種「誤解」和「誤判」，令中美關係日趨緊張，咁嘅思維，難怪「新冷戰」終出現；儘管國家主席習近平一再強調，中國無論發展到甚麼程度，永遠不稱霸、不擴張、不謀求勢力範圍，不搞軍備競賽。中國將繼續做世界和平的建設者、全球發展的貢獻者、國際秩序的維護者。

不過，一旦誤判深入骨髓，溶入血液，邊有咁易改變吖！何況山姆大叔很大程度又詐儍扮懵，好拉攏其他國家如日、韓、菲律賓和澳洲等共同圍堵中國，佢哋一味以為有乜嘢事發生，美國會保護及打救佢哋！美國向來口噏噏當秘笈，無奈大把老襯信以為真！這個世界咁多騙案，而且手法十年如一日都呃到人！橋唔怕舊最緊要係受！美國一再加以運用、演繹，又work喎！果然點到你唔服！

原圖：素材網

文章純屬作者個人意見，並不代表本報立場。